آبنائے ہرمز دوبارہ کھولنے کی سات شرائط پر امریکی جواب موصول: ایران

ایران نے کہا ہے کہ اسے جنگ بندی بحال کرنے اور آبنائے ہرمز دوبارہ کھولنے سے متعلق اپنی تازہ تجویز پر امریکا کا جواب موصول ہوگیا ہے۔ ایرانی وزیر خارجہ عباس عراقچی نے کابینہ کو امریکی جواب سے آگاہ کردیا، تاہم اس کی تفصیلات سامنے نہیں لائی گئیں۔

برطانوی خبر رساں ادارے ’رائٹرز‘ کے مطابق ایران نے کہا ہے کہ اسے امریکا کی جانب سے جنگ بندی بحال کرنے اور آبنائے ہرمز دوبارہ کھولنے سے متعلق اپنی تازہ تجویز کا جواب موصول ہوگیا ہے۔

ایرانی حکومت کی ترجمان فاطمہ مہاجرانی کے مطابق وزیر خارجہ عباس عراقچی نے کابینہ کو امریکی جواب موصول ہونے سے آگاہ کردیا ہے۔ انہوں نے امریکی جواب کی مزید تفصیلات نہیں بتائیں۔

’رائٹرز‘ کے مطابق یہ پیش رفت ایسے وقت میں ہوئی ہے جب ایران نے گزشتہ ہفتے امریکا کے ساتھ جنگ بندی بحال کرنے کے لیے ایک تجویز پیش کی تھی، جس کے تحت واشنگٹن ایرانی بندرگاہوں کی بحری ناکا بندی ختم کرے گا اور تہران سات روز کے اندر آبنائے ہرمز دوبارہ کھولے گا۔

امریکی صدر ڈونلڈ ٹرمپ نے اتوار کو کہا تھا کہ انہوں نے ایران کی تازہ تجویز مسترد کردی ہے، تاہم ایرانی وزیر خارجہ عباس عراقچی نے اس وقت کہا تھا کہ تہران کو امریکا کی جانب سے کوئی باضابطہ مستردی موصول نہیں ہوئی۔

’رائٹرز‘ کے مطابق اب ایرانی حکومت نے تصدیق کردی ہے کہ واشنگٹن کا جواب تہران کو پہنچ چکا ہے۔

گزشتہ ہفتے نیویارک میں اقوام متحدہ کی جنرل اسمبلی کے اجلاس کے موقع پر قطر نے امریکا اور ایران کے درمیان بالواسطہ رابطوں میں ثالثی کی تھی۔ یہ جنگ بندی ختم ہونے کے بعد دونوں ممالک کے درمیان پہلی قربت پر مبنی بات چیت تھی۔

مذاکرات سے باخبر ایک عہدیدار نے ’رائٹرز‘ کو بتایا کہ قطری حکام نے منگل کو دوحہ میں قیام کے دوران عباس عراقچی کو امریکی جواب سے آگاہ کیا۔ عہدیدار کے مطابق فریقین اس بات پر بڑی حد تک متفق ہیں کہ جنگ بندی اور تنازع کے خاتمے کے لیے کون سے اقدامات ضروری ہیں، تاہم ان اقدامات پر عمل درآمد کی ترتیب پر اختلاف برقرار ہے۔

ایران کی جانب سے پیش کی گئی تجویز جون میں امریکی صدر ڈونلڈ ٹرمپ اور ایرانی صدر مسعود پزشکیان کے درمیان طے پانے والے ایک عبوری معاہدے کو بحال کرنے کی کوشش ہے، جو چند ہفتوں بعد ختم ہوگیا تھا۔

اس منصوبے کے تحت امریکا سے ایرانی بندرگاہوں کی بحری ناکا بندی ختم کرنے، ایرانی تیل کی فروخت پر پابندیاں اٹھانے، تقریباً 12 ارب ڈالر کے منجمد ایرانی اثاثے جاری کرنے اور خطے میں جنگ بندی کی توقع کی گئی ہے۔ جنگ بندی میں لبنان اور یمن بھی شامل ہوں گے۔

ایران نے آبنائے ہرمز کو بھی اس منصوبے کا اہم حصہ قرار دیا ہے۔ تہران چاہتا ہے کہ حتمی معاہدے میں آبنائے پر اس کا کنٹرول برقرار رہے۔

جنگ کے دوران آبنائے ہرمز سے بحری آمدورفت شدید متاثر ہوئی ہے۔ حالیہ ہفتوں میں کچھ بحری جہازوں کی آمدورفت میں اضافہ ضرور ہوا، تاہم حملوں کے خطرے کے باعث شپنگ کمپنیوں نے زیادہ فیس وصول کرنا شروع کردی ہے۔ خام تیل، ریفائنڈ مصنوعات اور قدرتی گیس کی ترسیل اب بھی نمایاں طور پر متاثر ہے۔

برطانوی بحری سیکیورٹی ادارے یو کے ایم ٹی او نے بدھ کو بتایا کہ اس سے ایک روز قبل دو بحری جہازوں کو پروجیکٹائل سے نشانہ بنایا گیا تھا۔