کراچی۔پاکستان کرکٹ ٹیم کے کپتان مصباح الحق کا کہنا ہے کہ پاکستان ٹیم ایشیاکپ کیدفاع کی پوری صلاحیت رکھتی ہے لیکن اس کیلئے ہمیں غیر معمولی اور جارحانہ کھیل کا مظاہرہ کرنا ہوگا۔ اتوار کو صحافیوں سے گفتگو کرتے ہوئے مصباح الحق نے کہا کہ کسی بھی ٹیم کیلئے فتح بہت اہم ہوتی ہے، جیت کھلاڑیوں کے مورال کو بلند رکھتی ہے لیکن ہر میچ نیا میچ ہوتا ہے اور اس میں وہی کامیاب ہوتا ہے جو اچھا کھیلے، ہماری ٹیم ایشیا کپ کیدفاع کی پوری صلاحیت رکھتی ہے، گزشتہ ایونٹ کی طرح اس بار بھی ایشیا کپ بنگلہ دیش میں ہو رہا ہے اور پاکستان کے علاوہ سری لنکا اور ہندوستان بھی وہاں کے موسمی حالات سے اچھی طرح آشنا ہیں جبکہ بنگلہ دیش نے بھی گزشتہ ایونٹ میں کافی اچھی کارکردگی دکھائی تھی، اس لئے کوئی بھی ٹیم آسان نہیں اگر ہمیں جیتنا ہے تو ہر میچ میں اچھی کرکٹ کھیلنا ہوگی۔ مصباح الحق کا کہنا تھا کہ ڈیو واٹ مور کی کوچنگ میں ٹیم نے کئی نشیب و فراز دیکھے لیکن خوشی ہے کہ ان کی کوچنگ کے آخری دور میں ہم نے سری لنکا کو ون ڈے سیریز میں شکست دی اور ٹیسٹ سیریز برابر کی۔ انہوں نے کہا کہ قومی ٹیم کے کوچ کی تقرری پی سی بی کا معاملہ ہے وہ جسے چاہے مقرر کرے کیونکہ ہر کوچ ٹیم میں شامل کھلاڑیوں کی کارکردگی کو بہتر بنانے کی کوشش کرتا ہے اور مستقبل میں جو بھی کوچ مقرر کیا جائے گا وہ قومی ٹیم کو فائدہ ہی پہنچائے گا۔
