سین ڈیانگو۔ومبلڈن چیمپئن اینڈی مرے کے عمدہ کھیل کی بدولت برطانیہ نے امریکہ کو شکست دے کر 1986 کے بعد پہلی مرتبہ ڈیوس کپ کے کوارٹر فائنل میں جگہ بنا لی ہے۔مرے نے امریکی شہر سین ڈیاگو میں ہونے والے مقابلوں میں اتوار کو ریورس سنگلز میچ میں سیم کوئیری کو سات چھ، چھ سات، چھ ایک اور چھ تین کے سکور سے ہرا کر برطانیہ کو تین ایک ناقابلِ شکست سبقت دلائی۔26 سال کے مرے نے پہلا سیٹ ٹائی بریک میں جیتا لیکن وہ دوسرا سیٹ ٹائی بریکر پر ہی ہار گئے لیکن اگلے دو سیٹس میں انہوں نے بہتر کھیل کا مظاہرہ کرتے ہوئے برطانیہ کو اگلے مرحلے میں پہنچا دیا۔یہ مرے کی ڈیو
س کپ میں مسلسل 17ویں کامیابی ہے اور یہ 1935 کے بعد یہ پہلا موقع ہے جب برطانیہ نے ڈیوس کپ مقابلوں میں امریکہ کو شکست دی ہے۔اب اپریل میں ہونے والے کوارٹر فائنل میں برطانوی ٹیم اٹلی کے مدِمقابل ہوگی جس نے ارجنٹائن کو تین ایک سے شکست دے کر کوارٹر فائنل میں جگہ بنائی۔اٹلی میں ہونے والا یہ مقابلہ کلے کورٹ پر ہوگا۔اس سے پہلے مرے نے جمعے کو پہلے میچ میں ڈونلڈ ینگ کو شکست دی تھی اور پھر جیمز وارڈ نے کوئیری کو شکست دے کر برطانیہ کو دو صفر کی برتری دلوا دی تھی۔مرے کو ڈبلز میچ میں آرام دیا گیا تھا اور اس میچ میں برطانیہ کے کولن فلیمنگ اور ڈومینیکن اگلوٹ کی جوڑی برائن برادران کی جوڑی سے ہار گئی تھی۔وہیں دوسری جانب دنیا کے مختلف ممالک میں ڈیوس کپ ورلڈ گروپ کے ناک آئوٹ میچز جاری ہیں۔ جاپان نے پہلی بار میگاایونٹ کے کوارٹرفائنل میں جگہ بنالی۔فرانس، سوئٹزرلینڈ اور جرمنی نے بھی لاسٹ ایٹ مرحلے کیلیے کوالیفائی کرلیا ہے۔تفصیلات کے مطابق ٹوکیو میں کھیلے گئے پری کوارٹر فائنل میں جاپانی ٹیم نے کینیڈا کو 4-1سے شکست دے کر پہلی بار جدید فارمیٹ کے تحت ہونے والے مقابلوں کے کوارٹرفائنل میں جگہ حاصل کرلی۔ اس سے قبل پہلے سنگلز مقابلے میں کینیڈا کے فرینک ڈینووچ جاپان کے کی نیشکوری کے خلاف میچ کے دوران فٹنس مسائل کا شکار ہوکر دستبردار ہوگئے۔ کائی نیشکوری نے پہلے سیٹ میں 6-2 سے کامیابی حاصل کی تھی جبکہ دوسرے سیٹ میں انہیں 1-0 کی برتری حاصل تھی۔ دوسرے میچ میں جاپان کے گو سوڈا نے کینیڈا کے پیٹر پولینسکی کو 6-1 اور 6-4 سے زیر کرلیا اور اس طرح جاپان نے 4-1سے کامیابی حاصل کرکے کوارٹرفائنل میں جگہ بنالی۔ فرانس نے آسٹریلیا کے خلاف 3-1کی ناقابل شکست برتری حاصل کرلی۔ اس کامیابی میں جوولفریڈ سونگا اور رچرڈ گیسکٹ کی جوڑی نے ڈبلز ٹائی میں فتح اپنے نام کرکے اہم کردار ادا کیا۔ اس کا سامنا اپریل میں جرمنی سے ہوگا جس نے اسپین کے خلاف 3-1 کی برتری حاصل کرلی ہے۔ دریں اثنا اندور میں ہندوستان نے ڈیوس کپ ایشیا/اوشینا گروپ ون میں تائیوان کو بآسانی 5-0 سے شکست دے کر دوسرے رائونڈ میں جگہ حاصل کرلی جہاں اس کا مقابلہ اپریل میں جنوبی کوریا سے ہوگا۔
