اتر پردیش میں الگ الگ حادثہ میں 11باراتی ہلاک

لکھنؤ:اتر پردیش میں الگ الگ حادثوں میں 11باراتی ہلاک اور 36سے زیادہ افراد زخمی ہوئے ہیں۔مین پوری سے پولس کی ایک رپورٹ میں بتایا گیا ہے کہ ایک حادثے میں 8باراتی ہلاک ہوئے اور 33دیگر افراد زخمی ہوگئے ۔یہ حادثہ اس وقت پیش آیا جب ضلع کے بیواڑ علاقے کے کرپیا گاؤں کے نزدیک باراتیوں سے بھرے منی ٹرک کی ایک دیگر ٹرک سے ٹکر ہوگئی ۔یہ بارات کنہاوڑ گاؤں سے چھبرامؤکی سمت جارہی تھی۔اس حادثے میں پانچ افراد موقع پر ہی ہلاک ہوگئے اور تین افراد کی اسپتال پہنچنے پر موت ہوگئی۔زخمیوں کو نزدیکی اسپتال میں داخل کرایا گیاہے ۔سلطان پور کے ایک دوسرے حادثے میں باراتیوں کی ایک کاراور ایک ٹرک کے تصادم میں تین افراد ہلاک اور تین زخمی ہوگئے ۔یہ حادثہ ضلع کے کوریبھر علاقے کے نزدیک پیش آیا۔پولس نے بتایا کہ گاڑی میں سوار نوجوان ایک شادی کی تقریب میں شامل ہونے کے لئے جارہے تھے ۔اور یہ حادثہ رات کے 10بجے پیش آیا۔