اجے دیوگن کی فلم ’گنگا جل‘ نے جس طرح باکس آفس پر کامیابی درج کی تھی اسی کا نتیجہ ہے کہ اس کا سیکول بھی ناظرین کو دیکھنے کو ملے گا۔ کیونکہ پرکاش جھا کی گنگا جل کے سیکول میں بالی ووڈ میں موجودہ دور کی سب سے کامیاب ہیروئن پرینکا چوپڑا کو لیا گیا ہے۔ حالانکہ اس سے ایک طرف اجے دیوگن کو اس فلم میں نہ دیکھ کر ان کے چاہنے والوں کو تھوڑی مایوسی تو ضروری ہوگی لیکن اس کمی کو پورا کرنے کی کوشش اب پرینکا چوپڑہ کریں گی۔ جس طرح کا رول اجے دیوگن نے گنگا جل میں کرکے ناظرین کو مایوسی سے بچایا تھا اسی طرح کا رول اب پرینکا چوپڑہ بھی کرنے والی ہیں۔ ویسے تو پرینکا چوپڑہ نے اپنی پچھلی فلم میری کام میں اپنے ہنر اور ایکٹنگ سے یہ تو ظاہر ہی کر دیا ہے کہ وہ چیلنج فل رول کرنے کی صلاحیت رکھتی ہیں۔ اجے دیوگن کی گنگا جل نے نہ صرف باکس آفس پر بڑی کامیابی حاصل کی تھی بلکہ اس فلم کی تجزیہ کاروں میں بھی کافی تعریف کی گئی تھی۔
پرکاش جھا اور اجے دیوگن کے درمیان کافی پرانا رشتہ رہاہے۔ ان دونوں نے گنگا جل کے علاوہ اپہرن، راجنیتی جیسی کامیاب فلمیں بھی دی ہیں۔ بالی ووڈ میں پرکاش جھا سوشیو پالٹکل فلم بنانے کے لئے جانے جاتے ہیں اور گنگا جل کے سیکول کے لئے وہ فی میل اورینٹیڈ لیڈ ہی چاہتے ہیں اس لئے انہوں نے سیکول میں اجے دیوگن والا کردار پرینکا چوپڑہ کو دینا ہی بہتر سمجھا۔ اس فلم میں پرینکا چوپڑہ بھی کچھ اس انداز میں نظر آئیں گی کہ شاید اس سے پہلے ناظرین انہیں کبھی نہیں دیکھ پائے ہونگے ۔ اگرچہ اس سے پہلے پرینکا چوپڑہ نے فلم ڈان -۲ اور غنڈے میں پولیس افسر کا رول کیا ہے لیکن پرکاش جھا کی یہ فلم حقیقت کے بہت قریب سمجھی جاتی ہے۔ پرینکا چوپڑہ اپنے رول کے ساتھ جس طرح کا انصاف کرتی آئی ہیں اس سے لگتا ہے کہ گنگا جل میں ان کا کام ناظرین کو یقینا اچھا لگے گا اور ناظرین کو مایوسی نہیں ہوگی۔
