اداکارہ گیما ایٹکنسن کو عرب شیخ کی شادی کی پیشکش

لاس اینجلس: ہالی ووڈ کی حسیناؤں اور عرب شیوخ کے سکینڈلز کی خبریں اکثر مغربی میڈیا میں سامنے آتی رہتی ہیں۔ ایک ایسے ہی تازہ سکینڈل نے دنیا میں ہلچل برپا کر دی ہے کیونکہ اس دفعہ انتہائی مشہور اور دنیا کی خوبصورت ترین ماڈلز میں شمار ہونے والی ہالی ووڈ اداکارہ گیما ایٹکنسن نے دعویٰ کردیا ہے کہ اسے ایک عرب شہزادے نے کروڑوں ڈالر کی پیشکش کر کے اپنی تفریح طبع کے لئے خریدنے کی کوشش کی۔ 30 سالہ فنکارہ، جو کہ مشہور فٹبالر رونالڈو کی محبوبہ بھی رہ چکی ہیں، کا کہنا ہے کہ عرب شہزادے نے ان کی ہیجان انگیز تصاویر دیکھنے کے بعد پیشکش کی، جس پر انہیں بہت خوشی ہوئی، لیکن انہوں نے انکار کردیا۔ اخبار ڈیلی سٹار کے مطابق گیما کا کہنا ہے کہ شہزادے نے انہیں دبئی لیجا کر ایک محل میں رکھنے کی پیشکش کی تھی جہاں انہیں شہزادے کی بیوی کے طور پر خدمات سرانجام دینا تھیں۔ گیما نے بتایا کہ اس پیشکش کے متعلق جان کر انہیں خوشی کے ساتھ کچھ گھبراہٹ بھی ہوئی جس کے بعد انہوں نے اپنے ایجنٹ سے کہا کہ وہ انتہائی شائستگی کے ساتھ شہزادے سے معذرت کر لے۔ اداکارہ نے اخبار کو یہ بھی بتایا کہ ان کی خوبصورتی اور پھرتی کا راز یہ ہے کہ وہ روزانہ صبح ساڑھے چار بجے اٹھ کر سخت ورزش کرتی ہیں اور اپنی خوراک کا بھی بہت خیال رکھتی ہیں۔ انہوں نے پیشکش کرنے والے شہزادے کے متعلق مزید بتانے سے انکار کر دیا، جبکہ ان کے دعوے کی کسی آزاد زریعے سے تا حال تصدیق نہیں ہو سکی۔