ایک انسپکٹر سمیت چھ پولیس اہلکار چھاپے کے دوران زخمی

پٹنہ، 23 دسمبر (یو این آئی) پٹنہ کے اٹھمل گولاپولیس تھانہ کے ساوتھ چک گاوں میں ایک انسپکٹر سمیت چھ پولیس اہلکار کچھ بدمعاشوں کو پکڑنے کے لئے مارے گئے چھاپے کے دوران زخمی ہوگئے۔ پولیس کے مطابق اس ٹیم نے چھاپے کے دوران ایک خونخوار بدمعاش کو گرفتار کیا تھا اور اسے لے کر پولیس تھانہ آرہی تھی۔ اس گرفتاری پر احتجاج کرتے ہوئے گاوں والوں نے پولیس ٹیم پر حملہ کردیا اور بدمعاش کو چھڑا لیا۔ اس حملے میں ایک انسپکٹر سمیت مجموعی طور پر چھ پولیس اہلکار کو چوٹیں آئیں۔ گاوں والوں نے پولیس کی گاڑی کو بھی نقصان پہنچایا۔ زخمیوں کو قریب کے اسپتال میں داخل کرادیا گیا ہے۔