بولی وڈ اداکار رنویر سنگھ، دپیکا پڈوکون اور پریانکا چوپڑا کی فلم ’باجی راؤ مستانی‘ کا پہلا ٹریلر آج سوشل میڈیا پر شئیر کردیا گیا جو 
لوگوں کی توجہ کا مرکز بنا ہوا ہے۔
ہدایت کار سنجے لیلا بھنسالی کی فلم کا پہلا ٹریلر نہایت شاندار نظر آرہا ہے۔
اس ٹریلر کو آج ممبئی میں اداکار رنویر سنگھ اور دپیکا پڈوکون نے سنجے لیلا بھنسالی کے ہمراہ لانچ کیا جبکہ اداکارہ پریانکا چوپڑا اسکائپ کے ذریعے اس لانچ میں شریک ہوئیں۔
ٹریلر میں رنویر سنگھ کو متعدد بار جنگ کرتے دکھایا گیا جبکہ دپیکا نے اس دوران ان کا ساتھ دیا، فلم کے ٹریلر کو دیکھ کر اندازہ لگایا جاسکتا ہے کہ اس فلم میں ملبوسات پر کافی محنت کی گئی ہے۔
ٹائمز آف انڈیا کے مطابق اس لانچ کے دوران سنجے لیلا بھنسالی کا کہنا تھا کہ لوگوں کہ مطابق وہ اس فلم کو کبھی تخلیق نہیں کر پائیں گے جبکہ وہ 12 سال سے اس پر محنت کر رہے ہیں اور آخر کار اس کو بنانے میں کامیاب ہوئے ہیں۔
رنویر سنگھ کا اس دوران کہنا تھا کہ انہیں باجی راؤ کا کردار ادا کر کے فخر محسوس ہوا ہے۔
فلم ‘باجی راؤ مستانی’ کی کہانی باجی راؤ پیشوا اور رقاصہ مستانی کی محبت پر مبنی ہے۔ یہ کردار اداکار رنویر سنگھ اور دپیکا پڈوکون ادا کیا ہے۔ ان کے ساتھ اداکارہ پریانکا باجی راؤ کی پہلی بیوی کاشی بائی کا کردار ادا کیا ہے۔
فلم اس سال 18 دسمبر کو ریلیز کی جائے گی۔
