برائن لارا نے وہاب ریاض کی دعوت قبول کی

میلبورن۔ عظیم ویسٹ انڈین بلے باز برائن لارا نے پاکستانی فاسٹ بائولر وہاب ریاض کی پاکستان آنے کی دعوت قبول کرلی۔ ایک انٹرویو میں برائن لارا نے وہاب ریاض کا شکریہ ادا کرتے ہوئے کہا ہے کہ میں وہاب کے اسپیل کو کبھی نہیں بھول سکتا۔ برائن لارا نے ازراہ مذاق کہا کہ میں پاکستانی ایئر لائن سے سفر کروں گا یا کسی اور ایئر لائن کا ٹکٹ آ رہا ہے۔ میرے بہت سارے دوست پاکستان میں رہتے ہیں میں پاکستان جا کر خوشی محسوس
کروں گا۔ برائن لارا نے کہا کہ ایڈیلیڈ میں وہاب ریاض نے آسٹریلیا کے خلاف جو بولنگ اسپیل کرایا تھا اس نے مجھے بے حد متاثر کیا تھا۔ میں نے ٹوئیٹر پر اپنے اکائونٹ میں وہاب ریاض کیلئے پیغام چھوڑا تھا کہ وہاب ریاض نے شائد دیکھا نہیں۔ اس لئے اس نے مجھے ابھی تک جواب نہیں دیا ہے۔ برائن لارا نے کہا کہ میں کئی بار پاکستان جا چکا ہوں اور میری پاکستان سے خوشگوار یادیں وابستہ ہیں۔ اس لئے مجھے جب بھی بلایا گیا میں پاکستان جانا پسند کروں گا۔ پاکستان میں میرے پرستاروں کی بڑی تعداد ہے اور مجھے 1996 کے ورلڈ کپ کوارٹر فائنل میں نیشنل اسٹیڈیم کراچی میں جنوبی افریقہ کے خلاف سنچری آج بھی یاد ہے۔ مجھے فرصت ملی اور باضابطہ دعوت آئی تو میں پاکستان ضرور جائوں گا۔ پاکستان میں بدقسمتی سے انٹرنیشنل کرکٹ نہیں ہو رہی ہے۔ لیکن میری نیک خواہشات پاکستان کے ساتھ ہیں کہ پاکستان میں جلد انٹرنیشنل کرکٹ واپس آئے۔