بہار میں پنچایت انتخابات کے دوران پولیس پر فائرنگ

بھارشریف: بہار میں پنچایت انتخابات کے سلسلے میں آج ہو رہے پانچویں مرحلے کی پولنگ کے دوران نالندہ ضلع کے اسلام پور تھانہ علاقے کے ایک بوتھ پر مشتعل ہجوم نے ایک اسسٹنٹ انسپکٹر کو پیٹ پیٹ کر زخمی کر دیا جس کے بعد صورت حال کو کنٹرول کرنے کے لیے پولیس نے ہوا میں گولیاں چلائیں۔ پولیس ذرائع نے یہاں بتایا کہ خدا گنج پنچایت کے پسرائے مڈل اسکول کے بوتھ نمبر 76 پر کسی بات کو لے کر گاؤ ں والے مشتعل ہو گئے اور وہاں موجود بہار تھانہ کے اسسٹنٹ انسپکٹر سنجے کمار پر حملہ کر کے انہیں مار پیٹ کر زخمی کر دیا۔ بعد میں پولیس نے خود اپنی حفاظت کے مدنظر ہوا میں دو راؤنڈ گولیاں چلا کر صورت حال کو قابو میں کر لیا۔ ذرائع نے بتایا کہ زخمی داروغہ کا علاج مقامی سرکاری ہسپتال میں کرایا گیا ہے ۔ واقعہ کے بعد پولنگ مرکز اور ارد گرد کے علاقوں میں بڑی تعداد میں پولیس اہلکاروں کی تعیناتی کر دی گئی ہے ۔ پولیس کے مطابق واقعہ کے سلسلے میں پولنگ روکنا نہیں پڑا۔