لکھنؤ۔ (نامہ نگار)۔ تالکٹورہ پولیس نے تین گاڑی چوروں کو گرفتار کرتے ہوئے ان کے پاس سے چوری کی دو موٹر سائیکل، ایک طمنچہ اور ایک موبائل فون برآمد کیا۔ سی او بازار کھالہ راج کمار اگروال نے بتایا کہ تالکٹورہ پولیس نے گزشتہ شب پی اینڈ ٹی چوراہے کے نزدیک دو موٹر سائیکل سوار تین مشتبہ لوگوں کو دیکھ کر ان کو روکنے کی کوشش کی ۔ پولیس کو دیکھ کر موٹر سائیکل سوار بھاگنے لگے۔ اس پر پولیس نے ان کو دوڑایا تو وہ گر پڑے۔ پولیس نے جب تینوں کو پکڑا اور ان سے موٹر سائیکل کے کاغذات مانگے تو وہ ایک بھی پیپر نہیں دکھا سکے۔ ملزمین نے بتایا کہ برآمد ایک موٹر سائیکل راجہ جی پورم اور ایک موٹر سائیکل بارہ بنکی سے چوری کی گئی تھی۔ پولیس کو تلاشی میں ان کے پاس سے ایک طمنچہ اور ایک موبائل فون بھی ملا ہے۔ پوچھ گچھ میں ملزمین نے اپنا نام امیٹھی باشندہ رام نریش، سنی اور پپو بتایا۔
