سلمان اور د پیکا کی جوڑی بہت جلد فلموں میں نظرآئے گی

بالی ووڈ کے دبنگ ہیرو سلمان خان کے بارے میں کہا جاتا ہے کہ ان کا ہاتھ جس آرٹسٹ کے سر پر ہو اس کی فلمی گاڑی تیزی سے دوڑنے لگتی ہے۔ یہی وجہ ہے کہ تمام ہیروئنیں اپنے دل میں خواہش رکھتی ہیں کہ وہ سلمان خان کے ساتھ ایک عددفلم ضرور کریں۔ اس معاملے میں دپیکا پادوکون ابھی تک بدقسمت ہی رہی ہیں۔ وہ بالی ووڈ میں لمبا عرصہ گزارنے کے باوجود سلمان خان جیسے اداکار کے ساتھ صرف اس لئے کبھی نظرنہیں آئیں کہ انہیں شاہ رخ خان کے نزدیک سمجھا جاتا ہے۔ شاہ رخ خان اور سلمان کے درمیان من مٹائو کی خبریں برسوں میڈیا کی سرخیوں میں رہی لیکن اب ان دونوں بڑے اداکاروں میں دوستی ہو گئی ہے تو ایسے میں دپیکا پادوکون کی مراد پوری ہو سکے گی یہی سوال باقی ہے۔ ابھی تک کم ہی کامیاب ہیروئنیں ہیں جن کے ساتھ سلمان کی جوڑی نہ بنی ہو۔ دپیکا پادوکون میں سے ایک ہیں جنہیں ناظرین کبھی سلمان خان کے ساتھ نہیں دیکھ سکے ہیں۔ اگرچہ ڈائریکٹر پروڈیوسر
کی طرف سے کافی کوششیں کی گئی کہ دپیکا اور سلمان کو لے کر فلم بنائی جائے لیکن کسی وجوہات سے یہ بیل منڈیر نہیں چڑھ سکی۔ بالی ووڈ میں ہمیشہ چرچارہا کہ دپیکا سلمان کے ساتھ کام کرنا چاہتی ہیں۔
لیکن سلمان نے کبھی دپیکا کے ساتھ کام کرنے میں دلچسپی نہیں دکھائی کیونکہ اس وقت دپیکا شاہ رخ خان کے کافی قریب مانی جاتی تھی۔ بتایا جاتا ہے کہ پروڈیوسر ڈائریکٹر سورج بڑجاتیا کی فلم پریم رتن دھن پایو میں سلمان خان کی ہیروئن دپیکا کو لینے کی باتیں سامنے آئی تھی لیکن آخر کار دپیکا کی مضبوط حریف سونم کپور فلم کی ہیروئن بنیں۔ ایک وقت ایسا تھا جب دپیکا کو شاہ رخ خان کی ہیپی نیو ایئر اور سلمان خان کی کک قریب قریب ایک ساتھ آفر کی گئی تھی لیکن دپیکا پادوکون نے شاہ رخ خان کی فلم ہیپی نیو ایئر کو ترجیح دی تھی۔ ایسے میں سلمان خان کا ناراض ہونا فطرہ تھا۔ اس ناراضگی سے دپیکا اور سلمان کے قریب آنے کے امکانات کو جھٹکا لگا۔ بعد میں سلمان خان کی کک میں جیکلن فرنانڈیز ان کی ہیروئن بنیں۔ اس طرح جیکلن فرنانڈیز کا فلمی کیریئر جو قریب قریب ٹھہرا ہوا محسوس ہو رہا تھا آگے بڑھنے لگا۔ اب جب دپیکا کو اپنی غلطی کا احساس ہو چکا ہے اور وہ سلمان خان کے قریب آنا چاہتی ہیں تو ایسے میں یہ امید کی جا رہی ہے ان کی جوڑی فلموں میں بہت جلد نظر آئے گی۔ اس لئے بہت جلد دپیکا اور سلمان کی جوڑی کسی فلم میں نظر آتی ہے تو حیرت کی بات نہیں۔