سلمان نے ”شدھی” میں کام کی تصدیق کر دی

ممبئی: بالی ووڈ اداکار سلمان خان نے کرن جوہر کی فلم ”شدھی” میں کام کرنے کی تصدیق کر دی۔ میڈیا سے گفتگو کرتے ہوئے سلمان خان نے کہا کہ وہ کرن جوہر کی بھی ایک فلم کا حصہ ہیں۔ اس موقع پر جب ان سے سوال کیا گیا کہ کونسی فلم میں، تو انہوں نے بغیر کسی ہچکچاہٹ کے شدھی کا نام لیا۔ انہوں نے کہا کہ میں شدھی میں کرن جوہر کیساتھ کام کر رہا ہوں۔ واضح رہے کہ شدھی کرن جوہر کا ایسا پراجیکٹ ہے جو طویل عرصہ سے شروع نہیں ہو سکا۔ انہوں نے پہلے ریتک روشن اور کرینہ کپور کو سائن کیا تھا لیکن ان دونوں کے انکار کے بعد یہ خبریں سامنے آئیں کہ فلم میں رنویر اور انوشکا کام کریں گے لیکن یہ بھی غلط ثابت ہوئیں،اب سلمان خان نے فلم میں کام کرنے کو کنفرم کر دیا ہے۔ ایسی خبریں بھی تھیں کہ کرن جوہر اس فلم کیلئے شاہ رخ خان کو سائن کریں گے تاہم ایسا نہ ہو سکا اور اسکی وجہ ان دونوں کے بگڑتے ہوئے تعلقات ہیں۔ اطلاعات کے مطابق اپنے ٹی وی شو میں سلمان خان کو دعوت دینے پر شاہ رخ خان کرن جوہر سے ناراض ہو گئے تھے اور انکی ناراضگی اب تک دور نہیں ہو سکی جسکی وجہ سے وہ کرن جوہر جیسے دوست سے بھی منہ موڑ بیٹھے ہیں۔