ممبئی: بالی ووڈ میں شاہ رخ خان کے ساتھ کام کرنا ہر اداکارہ کی پہلی آرزو ہوتی ہے اور کیوں نہ ہوں آخر کنگ خان کا نام ہی فلم کی کامیابی کی ضمانت ہے، ایسے میں کینیڈین نژاد بے باک اداکارہ سنی لیون نے بھی ان کے ساتھ کام کرنے کی خواہش کا اظہار کر دیا ہے۔ ٹی وی کو انٹرویو دیتے ہوئے سنی لیون نے کہا کہ وہ اپنے ماضی کو بھلانا نہیں چاہتیں کیونکہ آج وہ جس مقام پر ہیں وہ انہیں اپنے ماضی ہی کی وجہ سے ملا ہے۔ ہر آدمی کی طرح انہیں بھی شہرت اچھی لگتی ہے تاہم اس شہرت کی وجہ سے انہیں تھوڑا ڈر بھی لگنے لگا ہے۔ کینیڈین نژاد اداکارہ کا کہنا تھا کہ بالی ووڈ میں ان کی پہلی ترجیح کام کا حصول ہے، انہوں نے پسندیدہ لوگوں کی کوئی فہرست نہیں بنائی ہے۔ اگر انہیں بھی بڑے ہدایتکاروں کے ساتھ کام کرنے کا موقع ملے تو یہ بہتر ہو گا، دوسری صورت میں وہ ان ہی لوگوں کے ساتھ کام کرنے کے لئے تیار ہیں جو پیشہ وارانہ طور پر پوری طرح سے اپنے کام کے ذریعے منزل حاصل کرنا چاہتے ہیں۔ تاہم ان کی دلی خواہش ہے کہ وہ شاہ رخ خان کے ساتھ بھی کام کر سکیں لیکن انہیں معلوم نہیں کہ یہ موقع مل بھی پائے گا یا نہیں۔
