سلطانپور۔(وارتا)۔اترپردیش میں سلطانپور ضلع کے دھمور علاقہ میں آج سلطانپور -رائے بریلی شاہراہ پر ایک نامعلوم گاڑی کی زد میں آنے سے تین بچوں کی موت ہو گئی اور ایک زخمی ہو گیا۔ حادثہ کے بعد برہم گاؤں والوں نے سلطانپور- رائے بریلی شاہراہ پر جام لگاکر مظاہرہ کیا۔ پولیس افسران کے سمجھانے بجھانے کے بعد وہ خاموش ہو گئے۔ پولیس کے مطابق ضلع کے دھمور علاقہ کے بنکے پور گاؤں کے نزدیک شوکت علی کے یہاں ایک پروگرام تھا۔ وہاں موجود لڑکے لڑکیاں ۱۴ سالہ گجن، ۸ سالہ بشریٰ اور پانچ سالہ شیخو و بارہ سالہ مسکان افلے پور گاؤں میںسڑک کے کنارے واقع دکان سے ٹافی خریدنے گئے تھے ۔اسی درمیان وہ نامعلوم گاڑی کی زد میں آگئے جس میں گجن، بشریٰ اور مسکان کی موت ہو گئی۔اس حادثہ میں شیخو زخمی ہو گیا۔ زخمی بچہ کو اسپتال میں داخل کرایا گیا ہے۔
