سڑک حادثے میں ایک ہی خاندان کے آٹھ افراد ہلاک، دو زخمی

بانکا : بہار میں بانکا ضلع کے کٹوریا تھانہ علاقے میں آج صبح سڑک حادثے میں ایک ہی خاندان کی تین خواتین سمیت آٹھ افراد ہلاک اور ایک بچہ سمیت دو دیگر زخمی ہو گئے ۔ پولیس ذرائع نے بتایا کہ ضلع کے مختلف تھانہ علاقوں میں رہنے والے ایک ہی خاندان کے قریب دس افراد بھاگلپور ضلع کے سلطان گنج واقع اتر واہنی گنگا کا پانی لے کر آٹو رکشہ سے جھارکھنڈ کے دیوگھر میں بابا ویدناتھ مندر میں پوجا ارچنا کرنے جا رہے تھے ۔ راستے میں بھدیا موڑ کے قریب مخالف سمت سے آ رہے ٹرک نے آٹو کو ٹکر مار دی۔ حادثے میں تین خواتین سمیت آٹھ افراد کی موت ہو گئی اور دو لوگ زخمی ہو گئے ۔ ہلاک شدگان میں لکھیا دیوی (50)، رادھیکا دیوی (42)، جربا دیوی (42)، دھنیشور یادو (45)، چوا یادو (55)، راجندر یادو (50) اور ٹھاکر یادو (52) کی شناخت کر لی گئی ہے جبکہ 35 سالہ ایک شخص کے نام کا پتہ نہیں چل سکا ہے ۔ زخمیوں میں پانچ سالہ بچہ سنتوش کمار کی حالت تشویشناک بنی ہوئی ہے جسے بھاگلپور میڈیکل کالج اسپتال بھیجا گیا ہے جبکہ ایک دوسرے کا علاج بانکا صدر اسپتال میں چل رہا ہے ۔ حادثے کے بعد ڈرائیور ٹرک سمیت فرار ہو گیا۔