شعیب کی سنچری پر ثانیہ مرزا خوشی سے نہال

لاہور۔ شعیب ملک کی سنچری پر ثانیہ مرزا خوشی سے نہال ہو گئی، شوہر کو شاندار سنچری پر مبارکباد۔ ٹویٹر پر اپنے ایک پیغام میں ثانیہ مرزا نے شعیب ملک کو سنچری پر مبارکباد دیتے ہوئے کہا کہ الحمداللہ شعیب ملک کی سنچری پر بہت خوش ہوں محنت ضرور رنگ لاتی ہے امید ہے سنچری پاکستان کی فتح میں اہم کردار ادا کرے گی اور آئندہ میچز میں ایسی ہی کارکردگی کا مظاہرہ کرینگے۔پاکستانی کرکٹ ٹیم کے سابق کپتان اور مڈل آرڈر بیٹسمین شعیب ملک چھ سال بعد ون ڈے انٹرنیشنل میں سنچری بنانے میں کامیاب ہوئے، آخری
بار 2009ء میں شعیب ملک نے سنچری بنائی تھی۔ شعیب ملک نے 32 میچز کھیلے تھے جس میں نہ تو وہ کوئی نصف سنچری اور نہ ہی سنچری بنا سکے تھے۔ 2009ء کے بعد 2015ء میں شعیب ملک نے زمبابوے کیخلاف سنچری مکمل کی یہ ان کی مجموعی طور پر آٹھویں سنچری ہے انہوں نے 70 گیندوں پر سنچرئی بنائی جس میں 2 چھکے، 12 چوکے بھی شامل ہیں شعیب میچ کی آخری گیند پر 112 رنز بنا کر آئوٹ ہوئے۔وہیں دوسری جانب وزیر اعظم نواز شریف نے زمبابوے کے خلاف ایک روزہ میچ جیتنے پر قومی کرکٹ ٹیم کو مبارکباد دیتے ہوئے امید ظاہر کی ہے کہ ٹیم باقی میچوں میں بھی بہترین کھیل کا مظاہرہ کرے گی۔ تفصیلات کے مطابق وزیر اعظم نواز شریف نے قومی کرکٹ ٹیم کو زمبابوے کے خلاف پہلا ون ڈے میچ جیتنے پر مبارکباد دی ہے۔ وزیر اعظم نے ایک روزہ میچ میں بڑا اسکور کرنے پر بلے بازوں کی پرفارمنس کو خاص طور پر سراہا۔ انہوں نے امید ظاہر کی کہ قومی کرکٹ ٹیم سیریز کے باقی 2میچوں میں بھی اسی طرح بہترین کھیل کا مظاہرہ کرے گی۔