لکھنؤ(نامہ نگار)اپنے مہنگے شوق پورے کرنے کیلئے انٹر کا ایک طالب علم گاڑی چوری کرنے لگا۔ گڑمبا پولیس نے گذشتہ شب مذکورہ طالب علم کو چوری کی ایک موٹرسائیکل کے ساتھ گرفتار کر لیا۔ ایس پی گومتی پار حبیب الحسن نے بتایا کہ گڑمبا پولیس نے اتوار کی رات جانچ کے دوران یونیورسٹی چوراہے کے نزدیک موٹرسائیکل سوار ایک نوجوان کو شک کی بنیاد پر پکڑا۔ پولیس نے جب اس سے موٹرسائیکل کے کاغذات طلب کئے تو وہ کوئی بھی کاغذ پیش نہ کر سکا۔شک ہونے پر پولیس نے جب سختی سے پوچھ گچھ کی تو اس نے بتایا کہ مذکورہ موٹرسائیکل اس نے گڑمبا چوراہے سے چوری کی تھی۔ ملزم نوجوان نے پولیس کو اپنا نام سیتاپور تمبور کا پردیپ جیسوال بتایا۔ پردیپ نیو ورلڈ پبلک کالج میں انٹر کا طالب علم ہے اور تروینی نگر علاقے میں کرائے کے مکان میں رہتا ہے۔ اس کے والد رام جیون مغلا پور گاؤں کے پردھان ہیں۔
