’طمنچے‘کے فن کاروں نے کی پائریسی روکنے کی اپیل

لکھنؤ (نامہ نگار)۔ہندی فلم ’طمنچے‘کے فن کار جمعہ کو راجدھانی اپنی فلم کی تشہیر کرنے پہنچے ۔ فلم طمنچے میں اداکار نکھل دویدی اور رچا چڈھا اہم کردار نبھا رہے ہیں ۔ نکھل اور رچا شہر کے گومتی نگر علاقہ میں اومیکس ہائٹ آئے تھے جہاں دونوں ہی فنکاروں نے کہا کہ آج ہم سب کو پائریسی روکنے کے لئے آگے آنا ہوگا ۔ انہوں نے کہا کہ پائریسی کے سبب لوگوں کو فلم کا اصلی مزہ نہیں مل پاتا ہے ۔ یہاں نکھل اور رچا نے اپنے مداحوں سے ان کی فلم کو دیکھنے کی اپیل کی ۔
اس موقع پر نکھل نے بتایا کہ لکھنؤ ان کا ننہال ہے اور یہاں ان کے سارے رشتہ دار رہتے ہیں ۔ اسی لئے وہ اپنی فلم کی تشہیر کرنے اس شہر میں آئے ہیں وہیں اداکارہ رچا نے بتایا کہ وہ بھی لکھنؤ کئی مرتبہ آچکی ہیں اور چند دنوں قبل انہوں نے لکھنؤ میں اپنی ایک دوسری فلم ’ایک اور دیوداس‘کی شوٹنگ کے لئے راجدھانی میں کافی وقت گزارا۔