اپنے شوہراور اداکار عامر خان کی کامیابیوں پر انتہائی خوش بولی وڈ ڈائریکٹر کرن راؤ نے کہا ہے کہ عامر بہت زیادہ خطرہ مول لیتے ہیں لیکن خوش قسمتی سے وہ اس میں کامیاب بھی رہتے ہیں۔
’فلمی صنعت خواہ عامر کی فلم کو کتنا ہی رسکی کیوں نہ سمجھے،وہ اپنی فلم پر اعتماد کرتے ہوئے بہت محنت کرتے ہیں اور میرے خیال میں وہ کامیابی کے حق دار ہیں‘۔
کرن نے پی ٹی آئی سے گفتگو میں کہا کہ عامر جس طرح فلموں میں اپنا تجربہ اور مہارت شامل کرتے ہیں اس کی کوئی مثال نہیں۔اپنی فلموں پر اعتماد کی وجہ سے وہ خوش قسمتی سے کامیاب رہتے ہیں۔
50 سالہ عامر بولی وڈ کے انتہائی باصلاحیت اداکاروں میں سے ایک سمجھے جاتے ہیں۔
جب کرن سے پوچھا گیا کہ آیا وہ ’میں ہوں نا‘ یا پھر ’دل دھڑکنے دو‘ جیسی فلمیں بنائیں گی تو ان کا کہنا تھا کہ اس کا انحصار سکرپٹ پر ہو گا۔
کرن نے بتایا کہ ان دنوں وہ اپنے بیٹے آزاد کے ساتھ انتہائی مصروف وقت گزارتی ہیں۔ کرن نے بتایا کہ آزاد نے انہیں زندگی کا ہر لمحہ پیار کے ساتھ گزارنا سکھایا ہے۔
’آزاد نے مجھے بہت کچھ سکھایا ہے لیکن ان میں سے سب سے اہم موجودہ لمحہ میں بھرپور طریقے سے زندہ رہنا ہے‘۔
