قومی شاہراہ پر سڑک حادثہ میں طالبہ کی موت

بریلی:والد کے ساتھ امتحان دینے آرہی طالبہ کی راستے میں ہوئے سڑک حادثے میں موت ہو گئی۔ جبکہ والد سنگین طور پر زخمی ہوگیا۔ اطلاع پر پہنچی پولیس نے زخمی کو علاج کےلئے ضلع اسپتال میں داخل کرایا۔ اور لاش کو پوسٹ مارٹم کے لئے بھیج دیا۔ پیلی بھیت کے بیسل پور تھانہ حلقہ کے غیاث پور گاو¿ں باشندہ شیباعرف آفرین کی بتھری چین پور علاقے کے بڑا بائی پاس پر سڑک حادثے میں موت ہو گئی۔ پوسٹ مارٹم ہاو س پر موجود متوفیہ کے کنبہ والوںنے بتایاکہ شیبا آج صبح اپنے والد رفعت کے ساتھ موٹر سائیکل پر بیٹھ کر مقابلہ جاتی امتحان میں شامل ہونے کےلئے بریلی آرہی تھی جب وہ لوگ بتھری چینپور کے بڑا بائی پاس پر پہنچے تبھی پیچھے سے آرہی نامعلوم گاڑی نے انہیں ٹکر مار دی جس سے وہ نیچے گر پڑے۔ ٹکر مارنے کے بعد نامعلوم گاڑی کا ڈرائیور موقع سے فرار ہو گیا۔