مختلف سڑک حادثات میں خاتون سمیت چار افراد کی موت

لکھنؤ:کرشنا نگر علاقہ میں سڑک پار کر رہے آٹو ڈرائیور کو بس نے کچل دیا جس سے اس کی موت ہو گئی۔ اس کے علاوہ موہن لال گنج، وبھوتی کھنڈاور گوسائیں گنج میں بھی ایک خاتون سمیت سڑک حادثات میں تین افراد کی موت ہو گئی۔
اناؤ کے رتن کھیڑا میں رہنے والا آٹو ڈرائیور ۵۳سالہ سونو دہلی میں آٹو چلاتا تھا جمعرات کی صبح وہ دہلی سے لکھنؤ آیا اور اس کے بعد اناؤ جانے کیلئے عالم باغ بس اڈہ گیا تھا۔ جب سونو عالم باغ پہنچا تو بس پر سوار ہونے کیلئے سڑک پار کرنے لگاتبھی اچانک روڈویز بس آگئی جس کی زد میں وہ آگیا اوربس اسے کچلتی ہوئی نکل گئی۔ سونو نے موقع پر ہی دم توڑ دیا۔ اطلاع ملنے پر پہنچی پولیس نے لاش کو قبضے میں لے کر پوسٹ مارٹم کیلئے بھیج دیا۔ سونو کے پاس سے ملے فون کی مدد سے اس کے گھر والوں کو مطلع کر دیا گیا۔
اس کے علاوہ موہن لال گنج کے بھدیسواں گاؤں کی ۰۴سالہ منی منگل کو اپنے بھانجے ارشد کے ساتھ موٹرسائیکل سے بنتھرا بہن سے ملاقات کرنے اس کے گھر جا رہی تھی کہ بھٹ گاؤں موڑ کے نزدیک ارشد کا گاڑی پر کنٹرول نہیں رہا اور منی سمیت گر گیا۔ مقامی لوگوں نے دونوں کو ٹراما سینٹر میں داخل کرایا جہاں دوران علاج منی کی موت ہو گئی،ارشد کی حالت نازک ہے۔
دوسری طرف نگوہاں کے رتن کھیڑا کا ۰۴سالہ سکھ لال دو ہفتہ قبل سائیکل سے ارجن گنج کی طرف جا رہا تھا کہ راستے میں شہید پتھ پر نامعلوم گاڑی نے اسے ٹکر مار دی اسپتال میں آج اس کی موت ہو گئی۔ وبھوتی کھنڈ کے مدھوریما ہوٹل کے نزدیک چالیس سالہ شخص نامعلوم گاڑی کی زد میں آگیا جس سے اس کی موت ہو گئی موقع پر پہنچی پولیس نے لاش کو پوسٹ مارٹم کیلئے بھیج دیا۔ پولیس کا کہنا ہے کہ متوفی کی شناخت نہیں ہو سکی ہے۔