مزاحیہ اداکار د یون ورما کا انتقال

پنے، 2 دسمبر (یو این آئی) بالی ووڈ کے مایہ ناز مزاحیہ اداکار اور ڈائریکٹر پروڈیوسر دیون ورما کا دل کا دورہ پڑنے اور گردہ خراب ہونے
کی وجہ سے گزشتہ شب یہاں ان کی رہائش گاہ پر انتقال ہوگیا۔ وہ 77برس کے تھے۔
خاندان کے ذرائع نے بتایا کہ انہوں نے رات تقریباً دو بجے آخری سانس لی۔ ان کے خاندان میں ان کی اہلیہ روپا گانگولی ہیں۔ محترمہ گانگولی بالی ووڈ کے ممتاز اداکار اشوک کمار کی بیٹی ہیں۔ دیون ورما کا آبائی شہر پنے تھا۔ جہاں سے انہوں نے سیاسیات اور سماجیات میں گریجویشن کیا تھا۔ اس کے بعد اداکار بننے کا خواب لئے انہوں نے فلمی دنیا میں قدم رکھا۔ انہوں نے انگور، چوری میرا کام، انداز اپنا اپنا، بے مثال،جدائی، دل تو پاگل ہے اور کورا کاغذ سمیت کئی فلموں میں بہترین ادا کاری کی۔ وہ مزاحیہ کردار کے لئے کئی بڑے ڈائریکٹر پروڈیوسرس کی پہلی پسند تھے۔ جن میں باسو چٹرجی ، رشی کیش مکھرجی،اور گلزار جیسے نام شامل ہیں۔
انہو ں نے ہندی کے علاوہ کچھ مراٹھی اور بھوجپوری فلموں میں بھی کام کیا۔ انکی آخری رسوم آج شام یروڈا شمشان گھاٹ میں ادا کی جائیں گی۔