لکھنؤ۔(نامہ نگار)۔ ٹیمپو میں سواریوں کا پرس اور دیگر سامان چوری کرنے والے تین بدمعاشوں کو گزشتہ شب قیصر باغ پولیس نے گرفتار کر لیا۔ گرفتار بدمعاشوں کے قبضہ سے بارہ ہزار روپئے نقد اور ایک موٹر سائیکل بھی برآمد کی گئی۔ سی او قیصر باغ ہردیش کٹھیریا نے بتایا کہ قیصر باغ پولیس نے کل دیر رات قیصر باغ چوراہے کے قریب چیکنگ کے دوران موٹر سائیکل سوار تین نوجوانوں کو روکا۔ پولیس نے جب نوجوانوں سے موٹر سائیکل کے کاغذات مانگے تو ایک بھی کاغذ نہیں دکھا سک
ے۔ پولیس نے جب ان لوگوں کی جامع تلاشی لی تو ان کے قبضہ سے بارہ ہزار روپئے برآمد ہوئے۔ پوچھ گچھ کے دوران نوجوانوں نے بتایا کہ وہ ٹیمپو میں سواری کی طرح بیٹھ جاتے ہیں اور دوسرے مسافروں کا پرس اور دیگر سامان چوری کر لیتے ہیں۔ اس واقعہ کے وقت ان کا ایک ساتھی ٹیمپو کے ساتھ موٹر سائیکل سے چلتا رہتا ہے۔ واقعہ کو انجام دینے کے بعد نوجوان موٹر سائیکل سے اپنے ساتھیوں کے ساتھ بیٹھ کر فرار ہو جاتے ہیں۔ ملزمین نے بتایا کہ برآمد رقم ایک مسافر سے چوری کی گئی تھی۔ ملزمین نے قیصر باغ علاقہ میں چوری اور لوٹ کی ایک -ایک واردات کو انجام دینے کا اقبال جرم کر لیا۔ گرفتار چوروں نے اپنا نام کانپور کا باشندہ راج کمار، فرخ آباد کا باشندہ سونو اور قنوج کا باشندہ پیوش بتایا۔ ملزمین چوری کے معاملہ میں آگرہ ضلع میںجیل جا چکے ہیں۔
