مصر کےشہر طنطا میں چرچ پر بم دھماکے سے 21 افراد ہلاک اور درجنوں زخمی ہوگئے۔
ابتدائی اطلاعات کے مطابق دارالحکومت قاہرہ سے 120 کلومیٹر دور طنطا شہر میں اتوار کو سینٹ جارج کوپٹک چرچ میں خاص عبادت کے سلسلے میں ہونے والے اجتماع میں بم دھماکے کے نتیجے میں 40 افراد زخمی ہوئے۔
خیال رہے کہ عسائیوں کے اجتماع پر بم دھماکہ ایک ایسے وقت پر ہوا ہے جب پوپ فرانسس چند ہفتوں بعد دورے پر مصر آرہے ہیں جبکہ طنطا میں عسائیوں کے اجتماعات پر اس سے قبل بھی حملے ہوتے رہے ہیں۔
پام سنڈے عیسائیوں کے مقدس دنوں میں سے ایک ہے جس کو وہ حضرت عیسیٰ کو یروشلم میں فاتح کے طورپر داخل ہونے کی مناسبت سے مناتے ہیں۔
میڈیا میں چرچ کے اندر کے دکھائے جانے والے مناظر کے مطابق لوگوں کی ایک بڑی تعداد موجود ہے اور خون میں لت پت لاشیں پڑی ہوئی ہیں۔
