ملک اور بیرون ملک کامیابی سے علی ظفر مسرور

لاہور: گلوکارو اداکار علی ظفر نے کہا ہے کہ ملک اور بیرون ملک ملنے والی کامیابی صرف اورصرف میری فیملی اورچاہنے والوں کی دعاؤں کی بدولت مجھے ملی ہیں۔ماڈلنگ، میوزک اوراداکاری کے شعبوں میں کام کرتے ہوئے بہت کچھ سیکھا۔ بالی ووڈ کے معروف فلمساز اداروں کے ساتھ کام کرنے کا تجربہ بہت اچھا رہا اور مستقبل میں بھی بہت سے منفرد اور اچھوتے پراجیکٹ کے ذریعے اپنے چاہنے والوں کوتفریح فراہم کرنے کا ارادہ ہے۔ ان خیالات کا اظہار علی ظفر نے ’’ایکسپریس‘‘ سے گفتگو کرتے ہوئے کیا۔ انھوں نے کہا کہ بالی ووڈ میں دو نئے پراجیکٹ سائن کیے ہیں جن کو معروف فلمساز ادارے بنانے جارہے ہیں۔ان فلموں میں بھی پہلے کی طرح معمول سے ہٹ کر کرداروں کو ادا کرتا دکھائی دونگا۔ میں خود کوبہت خوش نصیب سمجھتا ہوں کہ بالی ووڈ میں کام کرتے ہوئے مجھے الگ الگ کرداروں میں کام کرنے کا موقع ملا اور ان کو نبھاتے ہوئے میں نے بہت کچھ سیکھا۔ انھوں نے کہا کہ بالی ووڈ فلموں میں اداکاری کے ساتھ میوزک کنسرٹس کا سلسلہ بھی جاری ہے۔دونوں کام خاصے مشکل ہیں اور ان کو وقت دینے کے لیے مجھے بہت سمجھ بوجھ کر اپنا شیڈول ترتیب دینا ہوتا ہے۔ ایک سوال کے جواب میں علی ظفر نے بتایا کہ بالی ووڈ میں دو نئی فلموں کا معاہدہ طے پاچکا ہے لیکن اپنے کردار اور فلم کی کہانی بارے فی الحال نہیں بتا سکوں گا لیکن جونہی یہ فلمیں شوٹنگ کے لیے سیٹ کی زینت بنیں گی تو میڈیا کو اس حوالے سے تمام معلومات سے آگاہ کرونگا۔