ایپل کی جانب سے آئی فون سکس ایس کل متعارف کرایا جارہا ہے مگر یہ معروف کمپنی اس کے ساتھ ایپل ٹی وی اور اب تک کا سب سے بڑا آئی پیڈ ٹیبلیٹ بھی پیش کرسکتی ہے۔
ایپل کی جانب سے تو اس حوالے سے اب تک کوئی بات نہیں کی گئی مگر ایسی رپورٹس ضرور سامنے آرہی ہیں کہ یہ حالیہ برسوں میں ایپل کی سب سے بڑی تقریب ثابت ہوسکتی ہے۔
ایپل کی جانب سے 12.9 انچ اسکرین کا آئی پیڈ پرو آئی فون کے ساتھ متعارف کرائے جانے کا امکان ہے جو کہ فروخت کے لیے نومبر میں پیش کیا جائے گا۔
اس ٹیبلیٹ کی قیمت 1299 ڈالرز ہوسکتی ہے اور اس میں کئی نئے فیچرز بھی شامل کیے جارہے ہیں جس سے ملٹی ٹاسکنگ آسان ہوجائے گی۔
اسی طرح ایپل کی جانب سے آئی او ایس نائن کو بھی تقریب میں باضابطہ طور پر متعارف کرایا جائے گا جس کی ایک جھلک جون میں پہلے ہی پیش کی جاچکی ہے۔
ایسا امکنا ہے کہ آئی او ایس نائن نو ستمبر سے ہی ڈاﺅن لوڈ کے لیے دستیاب ہوگا۔
تاہم سب کو انتظار نئے آئی فون دو نئے ماڈلز کا ہے جن کا نام ممکنہ طور پر آئی فون سکس ایس اور آئی فون سکس ایس پلس ہوسکتا ہے۔
یہ نئے آئی فون گزشتہ برس کے مقابلے میں زیادہ پتلے اور فورس ٹچ اسکرین لیس کے فیچر سے لیس ہوں گے، جبکہ 12 میگاپکسلز رئیر کیمرے اور آئی او ایس نائن آپریٹنگ سسٹم بھی اس کا حصہ ہوں گے۔
