ورون اور کریتی سے بہت کچھ سیکھا، فرح خان

ممبئی: بالی وڈ کوریوگرافر اور ہدایتکار فرح خان نے کہا ہے کہ انہوں نے نوجوان اداکار ورون دھون اور کریتی سینن سے بہت کچھ سیکھا ہے۔ فرح خان فلم ”دل والے“ میں ورون دھون اور کریتی سینن کے گانے کیلئے کوریوگرافر کی خدمات سرانجام دے رہی ہیں۔ فرح خان نے سماجی میل جول کی ویب سائٹ پر اپنے ہمراہ نوجوان اداکاروں کی تصاویر شیئر کی ہیں۔ انہوں نے کہا کہ دونوں نوجوان اداکار باصلاحیت اور فرمانبردار ہیں اور انہوں نے ان کے ساتھ شوٹنگ کی ہے جس میں انہوں نے ان سے بہت کچھ سیکھا ہے۔ واضح رہے کہ فلم ”دل والے“ کی ہدایات روہت شیٹھی نے دیں ہیں جس میں شاہ رخ خان، کاجول، ورون دھون اورکریتی سینن مرکزی کردار ادا کریں گی۔ مذکورہ فلم 18 دسمبرکو ریلیز ہو گی۔