بولی وڈ کے دبنگ اداکار سلمان خان سماجی رابطے کی ویب سائٹ ٹوئٹر پر موجود اپنے مداحوں سے خاصے ناراض دکھائی دیتے ہیں۔
ٹوئٹر پر سلمان نے اپنے مداحوں کو تنبیہ کی ہے کہ اگر انہوں نے عامر خان اور شاہ رخ خان کے خلاف نازیبا زبان استعمال کرنا اور تینوں خان کے درمیان درجہ بندی کرنا 
بند نہ کیا تو وہ اپنا ٹوئٹر اکاؤنٹ بند کر دیں گے۔
ان کا کہنا تھا کہ انہوں نے ٹوئٹر کا استعمال کسی جنگ میں شامل ہونے کے لیے شروع نہیں کیا۔
سلمان خان کے مطابق اگر یہ سلسلہ جاری رہا تو وہ ٹوئٹر کو خیرباد کہہ دیں گے کیونکہ وہ یہاں محبت پھیلانے اور مداحوں کے ساتھ کچھ اچھے لمحات شیئر کرنے کے لیے آئے ہیں نا کہ اپنے ساتھی اداکاروں کی توہین کروانے کے لیے۔
بولی وڈ کے تینوں خان یعنی شاہ رخ خان ، عامر خان اور سلمان خان کے درمیان ایک دوسرے پر سبقت لے جانے کی سرد جنگ ایک عرصے تک جاری رہی مگر گزشتہ کچھ عرصے کے دوران تینوں اسٹارز کے درمیان دوستی بھی بڑھ رہی ہے جس کی تازہ ترین مثال حال ہی میں ٹوئٹر پر شاہ رخ اور عامر کی جانب سے سلمان کی فلم ‘بجرنگی بھائی جان’ کی تشہیر کرنا ہے۔
سلمان کا اپنی ٹویٹس کے ذریعے مزید کہنا تھا کہ ان کے پرستار ان کا عامر اور شاہ رخ سے مقابلہ کرکے اپنا پیار غلط طریقے سے ظاہر کر رہے ہیں۔
سلمان کا مزید کہنا تھا کہ وہ کسی اداکار کے مد مقابل نہیں آنا چاہتے۔سلمان اپنے پرستاروں کو وقت کو صحیح جگہ استعمال کرنے کا مشورہ بھی دیتے دکھائی دیے۔
