پیرس۔ ٹینس کی نئی عالمی رینکنگ میں رومانیہ کی سیمونا ہالیپ کیریئر میں پہلی مرتبہ ٹاپ 5 میں شامل ہوگئیں۔ دو درجے ترقی نے انھیں پانچویں پوزیشن کا حقدار بنوا دیا، سرینا ولیمز بدستور پہلے، لینا دوسرے، اگنیسکا ریڈوانسکا تیسرے اور وکٹوریا ایذرنیکا چوتھے نمبروں پر براجمان ہیں۔ مینز سنگلز میں راجر فیڈرر نے ترقی کے 3 زینے طے کر کے پانچویں پوزیشن پر قبضہ جما لیا۔ تفصیلات کے مطابق پیر کو جاری ہونے والی نئی ویمنز سنگلز ٹینس رینکنگ میں رومانیہ کی سیمونا ہالیپ کیریئر میں پہلی مرتبہ دنیا کی پانچ صف اول پلیئرز میں شامل ہوگئیں، ابتدائی چار پوزیشنز میں کوئی تبدیلی رونما نہیں ہوئی اور ان پر بالترتیب سرینا ولیمز، لینا، اگنیسکا ریڈوانسکا اور وکٹوریا ایذرنیکا براجمان ہیں، سربیا کی جیلینا جینکووچ بھی دو قدم آگے بڑھکر چھٹے نمبر پر پہنچ گئیں، البتہ روسی پلیئر ماریا شراپووا اتنے ہی درجے تنزلی کے بعد ساتویں نمبر پر چلی گئیں۔ جمہوریہ چیک
کی سابق ومبلڈن چیمپئن پیٹراکیوٹوا ایک درجہ ترقی پر آٹھویں نمبر پر آگئیں، جرمن کھلاڑی اینجلیک کیربر کو تین درجے تنزلی نے 9 ویں نمبر پر پہنچا دیا، سارا ایرانی بدستور ٹاپ 10 کی آخری شریک بنی ہوئی ہیں۔ انڈین ویلز میںٹائٹل جیتنے والی اطالوی پلیئر فلاویا پنیٹا نے ایک ہی جست میں 9 درجے کی چھلانگ لگا کر 12 ویں پوزیشن ہتھیالی۔ دوسری جانب مینز عالمی ٹینس رینکنگ میں بھی سوئس اسٹار راجر فیڈرر نئے سیزن میں پہلی مرتبہ پانچویں پوزیشن پر آگئے۔ انھیں تین درجے ترقی نے دوبارہ عروج کی جانب گامزن کیا، نڈال پہلے، جوکووچ دوسرے، اسٹینسلس واورنیکا تیسرے اور ڈیوڈ فیرر چوتھے نمبروں پر پہلے کی طرح موجود ہیں۔ اینڈی مرے نے بھی چھٹی پوزیشن پر قدم مضبوطی سے جمائے رکھے، جمہوریہ چیک کے ٹوماس بریڈیچ 2 درجے تنزلی کے بعد ساتویں نمبر آگئے، تین درجے ترقی نے امریکا کے دراز قامت پلیئر جون اسنر کو ٹاپ 10 میں آخری پوزیشن کا حقدار بنوا دیا۔
بواس جینت فٹبال کلب کے نئے منیجر
ماسکو۔اسپین کے معروف فٹ بال کلب جینت سینٹ پیٹرز برگ نے چیلسی اور ٹٹینہم ہاٹسپر کے سابق سربراہ آندرے ولاس بواس کو اپنا نیا مینیجر مقرر کیا ہے ۔خبر رساں ایجنسی کے مطابق 36 سال کے پرتگال رہائشی بواس 20 مارچ کو نئے کلب کے ساتھ سرکاری طور پر جڑ جائیں گے ۔ کلب نے منگل کو جاری اپنے بیان میں کہا ، جینت نے بواس کو اپنا اہم کوچ مقرر کیا ہے ۔ وہ 20 مارچ کو کلب کے ساتھ سرکاری معاہدے پر دستخط کریں گے۔ بواس کو جینس سے محنتانہ کے طور پر فی سیشن 85 لاکھ یورو ملنے کی امید ہے ۔
