گورکھپور (نامہ نگار)صدر پارلیمانی حلقہ سے سماجوادی پارٹی کے امیدوار راج متی نشاد کو کامیاب بنانے کے لئے گزشتہ شب پارٹی کارکنان نے سینئر لیڈر ظفرامین ڈکو کی قیادت میں گاندھی مجسمہ سے مشعل جلوس نکالا۔ جلوس کا شہر کے مختلف علاقوں میں خیر مقدم کیا گیا۔ سماجوادی پارٹی کارکنان آج میونسپل کارپوریشن کے احاطہ میں جمع ہوئے اور ہاتھوں میں مشعل لیکر گاندھی مجسمہ پرپہنچے جہاں وزیر مملکت جگدیش یادو نے مشعل جلوس کو ہری جھنڈی دکھاکر روانہ کیا۔ جلوس گھوش کمپنی، نخاس، ریتی چوک سے گذرتاہوا واپس ٹاؤن ہال واقع گاندھی مجسمہ پر پہنچ کر اختتام پذیر ہوا۔ اس سے قبل منعقد ہ جلسہ کو خطاب کرتے ہوئے جگدیش یادو نے کہا کہ انسان کی محنت کبھی ضائع نہیں ہوتی ہے۔ سماجوادی پارٹی کارکنان کی یہ جدوجہد گورکھپور علاقہ کے عام کارکنان میں طاقت پیدا کرے گی۔ انہوں نے کہا کہ آئندہ ہونے والے پارلیمانی انتخاب میں ریاست کی ۶۰نشستوں پر کامیابی حاصل کرکے سماجودی پارٹی سب سے بڑی پارٹی بنے گی۔ جلسہ کو خطاب کرتے ہوئے ضلع صدر اودھیش یادو نے کہا کہ صدر پارلیمانی نشست پر سماجوادی پارٹی نئی تاریخ رقم کرے گی۔ پارٹی کے سینئر لیڈر ظفر امین ڈکو نے کارکنان سے کہا کہ اگر کارکنان کا یہی جوش پارلیمانی انتخابات تک قائم رہے گا تو یقیناً سماجوادی پارٹی سب سے زیادہ نشستوں پر کامیاب ہوگی اور اس میں گورکھپور صدر نشست بھی شامل ہوگی۔ مشعل جلوس میں وجیہ اللہ
انصاری، شاہد انصاری، راجیش سنگھ، سریش سنگھ، جواہر یادو، وشوناتھ وشوکرما وغیرہ شامل تھے۔
