پرس چوری کرتے ہوئے چو رکو سپاہی نے پکڑا

لکھنؤ۔ عالم باغ بس اڈہ پر مزدوروں کے ٹھیکیدار کا پرس چوری کرتے ہوئے ایک چور کو پولیس اہلکار نے رنگے ہاتھوں گرفتار کر لیا۔ چور کی بس اڈہ پر موجود لوگوں نے پٹائی بھی کر دی۔ ملزم کے قبضہ سے دو ہزار روپئے نقد پولیس نے برآمد کئے۔ موصولہ خبر کے مطابق بس اڈہ پر حسن گنج کھدرا کا باشندہ ٹھیکیدار دلشاد احمد مزدوروں کو بس اڈہ پر چھوڑنے کیلئے گیا ہوا تھا اسی دوران ایک چور نے دلشاد کی پینٹ سے پرس نکالنے کی کوشش کی۔ بس اڈہ چوکی پر تعینات سپاہی ودیا ساگر کی نظر جب چور پر پڑی تو سپاہی نے بس اڈہ پر موجود مسافروں کی مدد سے چور کو پکڑ لیا۔
بس اڈہ پر موجود مسافروں نے چور کی پٹائی بھی کر دی۔جامع تلاشی کے دوران چور کے قبضہ سے تقریباً دو ہزار روپئے برآمد ہوئے۔ تفتیش کے دوران چور نے اپنا نام فتح پور کا باشندہ انل بتایا۔ انل فی الوقت کانپور میں رہ رہا ہے۔ پولیس نے بتایا کہ وہ بس میں سفر کرنے والے مسافروں کی جیب سے پرس چوری کیا کرتا تھا۔ اس کے خلاف پہلے بھی معاملات درج ہیں۔