لکھنؤ(نامہ نگار)عالم باغ پولیس نے جمعرات کی شب ایک شاطر گاڑی چور کو گرفتار کرتے ہوئے اس کے قبضے سے چوری کی ایک موٹرسائیکل برآمد کی ہے۔ اس کے علاوہ علی گنج پولیس نے بھی دو گاڑی چوروں کو گرفتار کر تے ہوئے ان کے قبضے سے چوری کی ایک موٹرسائیکل برآمد کی۔
عالم باغ پولیس نے جمعرات کی شب ٹیڑھی پلیا کے نزدیک گاڑیوںکی جانچ کے دوران موٹرسائیکل سوار ایک مشتبہ نوجوان کو روکنے کی کوشش کی پولیس کو دیکھ کر ملزم موقع سے فرار ہونے لگا۔ پولیس نے ملزم کا تعاقب کرتے ہوئے نوجوان کو گرفت میں لے لیا۔ پولیس نے جب اس سے موٹر سائیکل کے کاغذات پیش کرنے کو کہا تو وہ کوئی کاغذ نہیں پیش کر سکا۔ سختی سے پوچھ گچھ کی گئی تو ملزم نے بتایاکہ مذکورہ موٹرسائیکل اس نے کچھ عرصہ قبل عالم باغ علاقے سے چوری کی تھی۔ پوچھ گچھ میں ملزم نے اپنا نام کرشنا نگرکے کرشنا پلی کا امت کمار دکشت بتایا۔ اس نے گاڑی چوری کی واردات میں شامل اپنے ایک دیگر دوست کا نام بھی پولیس کو بتایا ہے۔ پولیس اس کی تلاش کر رہی ہے۔ ملزم امت پہلے بھی تین بار کرشنا نگر اور ایک بار عالم باغ تھانہ سے گاڑی چوری کے معاملہ میں جیل جا چکا ہے۔ اس کے علاوہ علی گنج پولیس نے جمعرات کی دیر شب ترکونیشور مند ربندھا روڈ کے نزدیک سے گاڑی چور علی گنج کے کلدیپ کشیپ اور گنگا ساگر کو گرفتار کیا۔ پولیس نے ان کے قبضے سے چوری کی ایک موٹرسائیکل بھی برآمد کی
ہے۔
