کوئلہ سے لدی مال گاڑی کے ڈبوں میں آگ

جموئی: بہار میں ایسٹرن سنٹرل ریلوے کے کیول۔جھاجھا ریلوے سیکشن پر آج کوئلہ سے لدی مال گاڑی کے دو ڈبوں میں آگ لگ گئی۔ریلوے پولیس ذرائع نے یہاں بتایا کہ اڈیشہ سے کوئلہ لے کر نیشنل تھرمل پاور کارپوریشن (این ٹی پی سی) کی باڑھ یونٹ جا رہی مال گاڑی کے دو ڈبوں میں اچانک آگ لگ گئی۔ پولیس کے مطابق سمولتلا ریلوے اسٹیشن کے ملازمین نے مال گاڑی کے ڈبوں سے دھواں اٹھتا دیکھ کر اس کی اطلاع جھاجھا اسٹیشن کو دی۔ذرائع نے بتایا کہ اطلاع ملنے کے بعد مال گاڑی کو جھاجھا ریلوے اسٹیشن کے وارڈ میں لے جایا گیا۔ آگ پر قابو پا لیا گیا ہے ۔ فوری طور پر آگ لگنے کی وجہ معلوم نہیں ہوسکی ہے ۔ ریلوے کے سینئر حکام معاملے کے تفتیش کر رہے ہیں۔