ہریانہ کی د س پیٹی شراب کے ساتھ ایک گرفتار

لکھنؤ(نامہ نگار) حسین گنج پولیس نے گذشتہ رات ایک کار سوار شراب اسمگلر کو گرفتار کیا ۔پولیس نے اس کے قبضہ سے ہریانہ کی بنی دس پیٹی شراب برآمد کی ۔موقع سے اس کا ایک ساتھی فرار ہونے میں کامیاب ہو گیا اس سلسلے میں سی او حضرت گنج راجیش شری واستو نے بتایا کہ پولیس نے گذشتہ رات مخبر کی اطلاع پر کینٹ روڈ مرلی نگر گیٹ کے پاس ایک آلٹو کار کو روکا ۔پولیس کو دیکھتے ہی کار سوار ایک نوجوان فرار ہو گیا جب کہ دوسرے کو پولیس نے گھیر کر پکڑ لیا۔کار کی تلاشی کے دوران اس میں سے پولیس کو چھ پیٹی ہریانہ کی بنی انگریزی شراب اور چار پیٹی دیشی شراب ملی ۔تفتیش کے دوران ملزم نے اپنا نام حضرت گنج کا رہنے والا عرفات بتایا جبکہ فرار ہوئے ساتھی کا نام دیش راج بتایا ۔گرفتار ملزم نے بتایا کہ ہم لوگ ہریانہ سے سستی قیمت میں شراب خرید کر لاتے تھے اور اسے لکھنؤ میں فروخت کر دیتے تھے ۔