ہوائی جہاز میں تکنیکی خرابی کے سبب مودی جرمنی میں کچھ دیر کےلئے ٹہرے

فرینکفرٹ، 21 ستمبر (یو این آئی) وزیر اعظم نریندر مودی کو امریکہ کے ہیوسٹن جاتےہوئے طیارے میں تکنیکی خرابی کے سبب جرمنی کے فرینکفرٹ ایئرپورٹ پر رکنا پڑا۔ مسٹر مودی تقریبا دو گھنٹے قیام کے بعد امریکہ کے لئے روانہ ہوگئے۔
جرمنی میں ہندوستان کے سفیر مکتا تومر اور قونصل جنرل پرتبھا پارکر نے مسٹر مودی کا استقبال کیا۔

وزارت خارجہ کے ترجمان رویش کمار نے ٹویٹ کرکے کہا ’’مسٹر مودی ہیوسٹن جاتے ہوئے فرینکفرٹ میں رکے۔ طیارے کی تکنیکی خرابی کی وجہ سے دو گھنٹے کے لئے فرینکفرٹ پہنچے جہاں ان کا ہندوستانی سفیر مکتا تومر نے استقبال کیا۔ ‘‘
مسٹر مودی جمعہ کی رات دیر گئے امریکہ کے دورے پر روانہ ہوئے۔ مسٹر مودی 27 ستمبر تک امریکہ میں رہیں گے ، جہاں وہ اقوام متحدہ کی جنرل اسمبلی سے خطاب کریں گے۔ وہ 24 ستمبر کو نیویارک میں امریکی صدر ڈونالڈ ٹرمپ کے ساتھ دوطرفہ ملاقات کریں گے۔ ان کا امریکی دورہ ہیوسٹن میں ہونے والے مختلف پروگراموں سے شروع ہوگا۔ وہ توانائی کے شعبے کے سی ای اوز ، ہندوستانیوں کے مختلف گروپوں اور امریکہ کے اعلی رہنماؤں کے ساتھ بات چیت کریں گی۔

مسٹر مودی اتوار کے روز مقامی وقت کے مطابق صبح 10 بجکر 15 منٹ پر ہیوسٹن کے غیر مقیم ہندوستانیوں کے پروگرام میں شرکت کریں گے۔ وہ اتوار کو ہیوسٹن میں ہونے والے ’ہاؤڈی مودی‘ میگا ریلی میں حصہ لیں گے۔ مسٹر ٹرمپ کے بھی اس پروگرام سے خطاب کرنے کی امید ہے ۔