سپریم کورٹ کے فیصلے پر الٰہ آباد ہائی کورٹ کے 13 ججوں کا اعتراض، فُل کورٹ میٹنگ بلانے کا مطالبہ

سپریم کورٹ کے ذریعہ الٰہ آباد ہائی کورٹ کے جج جسٹس پرشانت کمار کے خلاف دیے گئے حکم کو لے کر عدلیہ کے اندر غیر اطمینانی اور احتجاج کی لہر اٹھ کھڑی ہوئی ہے۔ الٰہ آباد ہائی کورٹ کے کم از کم 13 ججوں نے چیف جسٹس ارون بھنسالی کو خط لکھ کر اس حکم کے خلاف فُل کورٹ میٹنگ بلانے کا مطالبہ کیا ہے۔

4 اگست کو سپریم کورٹ کی جسٹس جے. بی. پاردیوالا اور جسٹس آر. مہادیون کی بنچ نے جسٹس پرشانت کمار کی ایک فوجداری معاملے کی سماعت اور دیے گئے فیصلے پر سخت تبصرہ کرتے ہوئے ہائی کورٹ کے چیف جسٹس کو حکم دیا کہ جسٹس کمار کو فوجداری معاملوں کی سماعت سے الگ کر دیا جائے۔ سبکدوش ہونے تک انہیں کسی سینئر جج کے ساتھ ڈویژن بنچ میں بیٹھایا جائے۔

یہ حکم ایک تجارتی تنازعہ سے متعلق عرضی کی سماعت کے دوران پاس کیا گیا تھا۔ عرضی دہندہ میسرس شکھر کیمیکلز نے اپنے خلاف درج فوجداری معاملے کو منسوخ کرنے کا مطالبہ کیا تھا، جسے ہائی کورٹ نے ٹھکرا دیا تھا۔

ہائی کورٹ کے فیصلے کو بدلتے ہوئے سپریم کورٹ نے جسٹس پرشانت کمار کے تبصرے پر سخت ردعمل ظاہر کرتے ہوئے کہا، ’’ہم فیصلہ کے پیرا 12 میں درج تبصروں سے حیران ہیں… جج نے یہاں تک کہہ دیا کہ شکایت کنندہ کو سول طریقہ اپنانے کے لیے کہنا بہت ہی نامناسب ہوگا کیونکہ سول مقدمے طویل وقت لیتے ہیں اور اس لیے فوجداری کارروائی کی اجازت دی جا سکتی ہے۔‘‘

عدالت عظمیٰ نے اس موقف کو ناقابل قبول بتاتے ہوئے ہائی کورٹ کا حکم منسوخ کر دیا اور اس معاملے کو کسی دیگر جج کو نظرثانی کے لیے بھیج دیا۔

سپریم کورٹ کے اس حکم سے الٰہ آباد ہائی کورٹ کے ججوں میں گہری ناراضگی پیدا ہو گئی۔ سرکاری ذرائع کے مطابق جسٹس ارندم سنہا نے ہائی کورٹ کے چیف جسٹس کو خط لکھ کر گہرے صدمے اور درد کا اظہار کیا ہے۔ انہوں نے کہا، ’’4 اگست کا حکم بغیر کوئی نوٹس جاری کیے پاس کیا گیا اور اس میں جسٹس پرشانت کمار کے خلاف سنگین تبصرے کیے گئے۔‘‘

جسٹس سنہا نے مشورہ دیا کہ فُل کورٹ میٹنگ بلائی جائے اور یہ تجویز پاس کی جائے کہ سپریم کورٹ کی ہدایات کے مطابق پرشانت کمار کو فوجداری بنچ سے ہٹایا نہیں جائے گا کیونکہ سپریم کورٹ کو ہائی کورٹ کے انتظامی امور پر کنٹرول کا حق نہیں ہے۔ ساتھ ہی انہوں نے یہ بھی کہا کہ سپریم کورٹ کے حکم کی ’زبان اور لہجے‘ پر بھی اعتراض درج کرنی چاہیے.