امریکی انتخابات میں 57مسلم امیدوار منتخب

واشنگٹن : امریکہ کے جنرل الیکشن میں حصہ لینے والے مسلم امریکی امیدواروں میں نصف سے زائد نے کامیابی حاصل کی ہے جو امریکی انتخابات کی تیاری میں نمایاں تبدیلی ہے۔ مسلم گروپوں نے مشترکہ سروے میں کہا کہ 110 مسلم امریکیوں نے مختلف عہدوں کیلئے انتخاب لڑا جن میں سے 57 کامیاب ہوئے۔

کونسل برائے امریکی اسلامی تعلقات ، جیٹ پیاک اور ایم پاور چینج نے 3 نومبر کے صدارتی انتخاب کے بعد یہ تفصیلات پیش کی ہیں۔ 24 ریاستوں اور واشنگٹن ڈی سی میں پھیلی ہوئی مختلف نشستوں کیلئے مسلم امیدواروں نے مسابقت کی اور یہ تعداد 2016ء کے بعد سے اعظم ترین ہے۔ 57 کامیاب امیدواروں میں سے 7 نے اپنے متعلقہ ریاستی عہدوں کیلئے منتخب ہوکر تاریخ بنائی۔ ان عہدوں پر پہلے کبھی کوئی مسلم منتخب نہیں ہوا تھا۔ امریکی ایوان نمائندگان میں 435 نشستیں ہیں اور ایوان بالا (سینیٹ ) کی 100 سیٹیں ہیں۔ جیٹ پیاک کے ایگزیکٹیو ڈائریکٹر محمد مسوری نے بتایا کہ امریکہ میں مسلمانوں کی سیاسی نمائندگی میں اضافہ کلیدی تبدیلی ہے جو بڑھتے اور پرتشدد اسلاموفوبیا کو زائل کرنے میں مدد دے گی۔ منتخب مسلم عہدیداران اور ان کے ساتھ دیانت دار و ذمہ دار میڈیا مل کر اسلام کے تعلق سے پھیلی کئی غلط فہمیوں کو دُور کرسکتے ہیں۔ اسٹیٹ الیکشن میں منتخب 11مسلم امیدوار ماری ٹرنر ، مدینہ ویلسن ۔ اینٹن ، امام جودہ ، سامبا بالدہ ، کریس بنجامن ، فادی قدورہ ، ہودھان حسن ، محمد نور ، عمر فتح ، ابراہم عائشہ اور زہران ممدانی ہیں ۔