کیجریوال کی جھاڑو یاترا شروع

غازی آباد۔ یکم مارچ (یو این آئی) عام آدمی پارٹی (آپ) کے لیڈر اروند کیجریوال نے لوک سبھا انتخابات کے لئے پارٹی کی انتخابی تشہیر کا آج یہاں باضابطہ آغاز کرتے ہوئے سہ روزہ جھاڑو چلاؤ یاترا شروع کی۔مسٹر کیجریوال کی یہ یاترا کوشمبی سے شروع ہوکر غازی آباد ہوتے ہوئے پلکھوا ، ہاپڑ، امروہہ، مرادآباد، رام پور، بریلی، شاہجہان پور اور ہردوئی تک جائیگی۔دوسرے روز یہ جھاڑو چلاؤ یاترا اناؤ کی جانب روانہ ہوگی اور وہاں سے یہ قافلہ کانپور جائے گا۔ دہلی کے سابق وزیراعلی یہاں ایک ریلی سے خطاب کریں گے۔ وہ اس دوران تجارتی اداروں اور سماجی تنظیموں کے لیڈروں سے ملاقات بھی کریں گے۔ تین مارچ کو یہ یاترا کرواں، اریا، اٹاوہ، فیروزآباد، آگرہ، متھرا اور پلول پہنچے گی۔اترپردیش میں لوک سبھا کی 80 سیٹیں ہیں اور اسی لحاظ سے اس ریاست کو ملک کاسیاسی رخ طے کرنے کے لئے کافی اہم سمجھا جاتاہے۔عام آدمی پارٹی کے لیڈر کمار وشواس کانگریس کے نائب صدر راہل گاندھی کے خلاف امیٹھی سے الیکشن لڑیں گے ۔ اس طرح کی خبریں ہیں کہ پارٹی شازیہ علمی کو رائے بریلی سے محترمہ سونیا گاندھی کے خلاف میدان میں اتارنے کے بارے میں سوچ رہی ہے۔