کورونا کے روزانہ معاملوں میں مسلسل دوسرے دن اضافہ

نئی دہلی، 29 اکتوبر (یواین آئی) کیرالہ ، مہاراشٹر اور دہلی میں کورونا وائرس کے انفیکشن کے معاملات میں اضافے کی وجہ سے ، ملک میں مسلسل دوسرے دن ان کی تعداد میں اضافہ ہوا ہے اور یہ تعداد ایک دن میں 50 ہزار کے قریب پہنچ گئی ہے اور ہلاکتوں کی تعداد 500 سے بھی تجاوز کرگئی ۔

جمعرات کو صحت و خاندانی بہبود کی مرکزی وزارت کے جاری کردہ اعداد و شمار کے مطابق ، گذشتہ 24 گھنٹوں کے دوران کورونا کے 49،881 نئے کیس رپورٹ ہوئے ہیں اور متاثرہ افراد کی تعداد 80.40 لاکھ ہوگئی ہے۔ ایک روز قبل بدھ کے روز 43،843 مریضوں میں انفیکشن کی اطلاع ملی تھی ، جبکہ منگل کو یہ تعداد 36،470 تھی۔

پچھلے 24 گھنٹوں کے دوران ، 56،480 افراد نے وبا کو شکست دی۔ اس سے زیر علاج مریضوں کی تعداد 7،116 سے گھٹ کر 6،03،687 ہوگئی ہے۔ وہیں 517 مریضوں کی موت کے بعد ، ہلاک ہونے والوں کی تعداد 1،20،527 ہوگئی ہے۔

کورونا سے اب تک 73.16 لاکھ افراد بازیاب ہوئے ہیں۔ کووڈ ۔19 سے نجات پانے والے افراد کی شرح 90.99 فیصد اور فعال مریضوں کی شرح 7.51 فیصد ہوگئی ہے ، جبکہ اموات کی شرح 1.50 فیصد ہے۔
کورونا کی وبا سے سب سے زیادہ متاثر مہاراشٹرا میں 1،783 معاملوں کی کمی کی وجہ سے گذشتہ 24 گھنٹوں کے دوران ان کی تعداد کم ہوکر 1.30 لاکھ ہوگئی ہے ، جبکہ 91 اموات ہونےسے ہلاکتوں کی تعداد بڑھ کر 43،554 ہوگئی ہے۔ وہیں، اس عرصے کے دوران 8،430 افراد صحت مند ہوچکے ہیں ، اور اس وبا سے لوگوں کو راحت ملنے والوں کی تعداد 14.87 ہوگئی ہے۔