اسلام میں والدین کے حقوق- روز مادر آپ سب کو مبارک ہو

آپ کے رب نے حکم فرما دیا ہے کہ تم اﷲ کے سوا کسی کی عبادت مت کرو اور والدین کے ساتھ حسنِ سلوک کیا کرو، اگر تمہارے سامنے دونوں میں سے کوئی ایک یا دونوں بڑھاپے کو پہنچ جائیں تو انہیں ’’اُف‘‘ بھی نہ کہنا اور انہیں جھڑکنا بھی نہیں اور ان دونوں کے ساتھ بڑے ادب سے بات کیا کرو اور ان دونوں کے لیے نرم دلی سے پیش آو اور (اﷲ کے حضور) عرض کرتے رہو : اے میرے رب ان دونوں پر رحم فرما جیسا کہ انہوں نے بچپن میں مجھے رحمت و شفقت سے پالا تھا ۔

ایک روز ایک شخص حضور صلی اللہ علیہ والہ وسلم کی بارگاہ اقدس میں حاضر ہوا اور عرض کیا یارسول اللہ، لوگوں میں حسن سلوک کا سب سے زیادہ مستحق کون ہے آپ نے فرمایا تمہاری والدہ۔ انہوں نے دوسری بار عرض کیا پھر کون ہے آپ نے فرمایا تمہاری والدہ اس شخص نے تیسری مرتبہ عرض کیا یا رسول اللہ پھر کون ہے آپ نے فرمایا تمہاری والدہ اور انہوں نے جب چوتھی مرتبہ اسی سوال کو دہرایا تو حضور صلی اللہ علیہ والہ وسلم نے فرمایا اس کے بعد تمہارا والد ہے۔

قرآن پاک کے بعد معتدد احادیث پاک میں حضور صلی اللہ علیہ والہ وسلم نے بزرگوں کی عزت و تکریم کی تلقین فرمائی اور بزرگوں کا یہ حق قرار دیا کہ کم عمر اپنے سے بڑی عمر کے لوگوں کا احترام کریں اور ان کے مرتبے کا خیال رکھیں۔

بیس جمادی الثانی بنت رسولۖ، حضرت فاطمہ زہرا (س) کا یوم ولادت باسعادت ہے۔ آپ (س) کے یوم ولادت باسعادت کواسلامی جمہوریہ ایران میں یوم خواتین اور روز مادر کا نام دیا گیا ہے ۔

÷÷÷÷÷÷÷÷÷÷÷÷\
عورت کی چار حیثیتیں:

اسلام نے عورت کو جہاں ذلت و رسوائی کے قعرعمیق سے نکال کر اعلیٰ درجے کا مقام عطا کیا، وہیں بہت سے حقوق و فرائض سے بھی نوازا ۔ یہاں تک کہ وہی لوگ جو کل تک عورت کو بے حیثیت سمجھتے تھے ، اسلام کی آمد کے بعد عورت کے متعلق بات کرتے ہوئے بھی ڈرنے لگے ۔اسی لئے اسلام ہی بجا طور پر اس کا مستحق ہے کہ اسے فطرت انسانیت کاشاہ کار قرار دیاجائے ۔

صنف نازک کی شخصیت کا تجزیہ کیا جائے تومجموعی طورپر اس کی چار حیثیتیں ابھرکر سامنے آتی ہیں :(1)ماں (2) بہن(3) بیوی (4)بیٹی

اسلام نے ماں کی حیثیت سے عورت کا مقام اس قدر بلند کیا ہے کہ معاویہ بن جاہمہؓ سے روایت ہے کہ رسول اکرمؐ کی خدمت میں میرے والد حاضر ہوئے کہ یا رسول اﷲ !میں چاہتا ہوں کہ جہاد کروں اور آپؐ سے مشورہ کرنے کے لیے حاضر ہوا ہوں۔ آپؐ نے فرمایا کہ تمھاری ماں زندہ ہے ؟ عرض کیا کہ زندہ ہے ، تو آپؐ نے فرمایا کہ تو پھراسی کے ساتھ رہو، اس لیے کہ جنت ماں کے پاؤں کے نیچے ہے ۔ (نسائی)
حضرت ابوہریرہؓ سے روایت ہے کہ ایک شخص نے رسول اکرمؐ سے دریافت کیا کہ یا رسول اﷲ ﷺمیرے حسن سلوک کاسب سے زیادہ مستحق کون ہے ؟ تو آپ ؐ نے تین مرتبہ فرمایا کہ تیری والدہ اور چوتھی مرتبہ فرمایا کہ تیرے والد۔ (بخاری)

اس روایت سے معلوم ہوا کہ باپ کے مقابلے میں ماں کی حیثیت و مرتبہ استحقاقِ خدمت میں تین گنا زیادہ ہے ۔ اگر ماں کافر بھی ہو تو اس کے ساتھ حسنِ سلوک کرنے کا حکم ہے ۔ حضر ت اسماءؓ نے دریافت کیا کہ یارسول اﷲ ﷺ میری والدہ اسلام سے نفرت کرتی ہے اب وہ میرے پاس آئی ہے ، وہ میرے حسن سلوک کی مستحق ہے یا نہیں؟ تو آپؐ نے فرمایا کہ اپنی ماں سے حسن سلوک کرو۔

حسینی ویب سائٹ شیعہ قوم ڈاٹ کام کی جانب سے ہم اپنے تمام قارئین، ناظرین اور سامعین کی خدمت میں اس مبارک دن کی مناسبت سے ہدیہ تبریک و تہنیت پیش کرتے ہیں۔