مضبوط جمہوریت کے لئے مقامی سطح پر عدلیہ کی مضبوطی ضروری: جسٹس رمن

نئی دہلی، 14نومبر ؛چیف جسٹس این وی رمن نے مضبوط جمہوریت کے لئے صحت مند عدالتی نظام کی ضرورت پر زور دیتے ہوئے اتوار کو کہاکہ زمینی سطح پر انصاف نظام مضبوط کئے بغیر ہم ایک صحت مند عدلیہ کا تصور نہیں کرسکتے۔

جسٹس رمن نے نیشنل لیگل سروس اتھارٹی کی طرف سے ملک گیر 40روزہ قانونی بیداری مہم کے اختتام کے موقع پر کہاکہ جمہوریت کو مضبوط بنانے کے لئے عدلیہ ہمیشہ آگے رہی ہے۔ اس ملک کی آئینی عدالتوں کے فیصلوں نے جمہوریت کو پھلنے پھولنے کے قابل بنایا ہے۔

انہوں نے کہاکہ ہندستانی عدلیہ کو مقامی عدالت کے کاموں کے ذریعہ سے لوگ جانتے ہیں۔ عدلیہ لوگو کی مدد کی آخری امید ہوتی ہے۔ پریشانی میں مبتلا خاتون، دیکھ بھال کی ضرورت پڑنے پر بچے یا پھر غیر قانونی قیدی سب سے پہلے نچلی عدالت پہنچتے ہیں۔

https://youtu.be/L4wWlOMCOqM

انہوں نے عدالتی فیصلوں کے معاشرہ پر اثرات کا ذکر کرتے ہوئے ہائی کورٹوں اور نچلی عدالتوں سے آسان اور واضح زبان میں فیصلہ لکھنے کی اپیل کی۔ انہوں نے کہاکہ چونکہ ہمارے فیصلے کا معاشرہ پر بہت اثر ہوتا ہے اس لئے ہمیں آسان اور واضح زبان میں اپنے فیصلے لکھنے چاہئیں۔

چیف جسٹس نے کہاکہ مقامی عدالتوں کے انتظامات کو مضبوط بنانے کے ساتھ ساتھ ہمیں ایسے رضاکاروں کو ساتھ جوڑنے کی ضرورت ہے جو ضرورت پڑنے پر متاثرین اور ان کے کنبوں کی حساسیت کے ساتھ مدد کر سکیں۔
انہوں نے قانونی مدد تحریک کو آگے بڑھانے کے لئے وکلا، قانون کے طلبا کے ساتھ ساتھ قانون کے شعبہ میں بیداری پھیلانے کا کام کرنے والے زیادہ سے زیادہ لوگوں کو جوڑنے کو وقت کی مانگ قرار دیا۔