اترپردیش اسمبلی انتخابات : چوتھے مرحلے میں 59 نشستوں پر ووٹنگ شروع

لکھنؤ، 23 فروری (یو این آئی) اتر پردیش میں اسمبلی انتخابات کے چوتھے مرحلے میں نو اضلاع کی 59 نشستوں پر بدھ کی صبح سات بجے ووٹنگ شروع ہو گئی۔

انتخابات کے اس مرحلے میں شام 6 بجے تک ہونے والی ووٹنگ میں 91 خواتین امیدواروں سمیت 2.13 کروڑ ووٹر ای وی ایم میں کل 624 امیدواروں کی قسمت کا فیصلہ کریں گے۔ الیکشن کمیشن نے آزادانہ، منصفانہ اور پرامن پولنگ کے انعقاد کے لیے بھرپور تیاریوں کے درمیان وسیع حفاظتی انتظامات کے سائے میں پولنگ شروع ہونے کی اطلاع دی ہے۔ کمیشن کی طرف سے بتایا گیا کہ چوتھے مرحلے میں نو اضلاع پیلی بھیت، کھیری، سیتا پور، ہردوئی، اناؤ، لکھنؤ، رائے بریلی، باندہ اور فتح پور کی 59 نشستوں پر صبح 7 بجے ووٹنگ شروع ہوئی۔
موصولہ اطلاعات کے مطابق پولنگ شروع ہونے کے وقت کچھ پولنگ اسٹیشنوں پر چند ووٹر ہی پہنچے تھے۔ ایک سرد صبح پولنگ شروع ہونے پر ووٹرز سورج طلوع ہونے کا انتظار کر رہے ہیں۔ کووڈ پروٹوکول کے تحت ووٹروں کو صرف ماسک پہن کر پولنگ اسٹیشن میں داخل ہونے کی اجازت ہے۔ اس کے علاوہ الیکشن کمیشن نے پولنگ اسٹیشنز پر سینیٹائزر اور تھرمل اسکیننگ سمیت دیگر انتظامات بھی کیے ہیں۔