جل جیون مشن ملک کی ترقی کو نئی رفتاردے گا: مودی

نئی دہلی، 9 اپریل (یو این آئی) وزیر اعظم نریندر مودی نے ہفتہ کو کہا کہ جل جیون مشن (جے جے ایم) کے ذریعہ ملک کی ترقی کو ایک نئی رفتار مل رہی ہے۔

اپنے ٹویٹ میں مسٹر مودی نے کہا ’’جل جیون مشن آج ملک کی ترقی کو نئی رفتار دے رہا ہے۔‘‘
انہوں نے کہا کہ گزشتہ تین سالوں میں جس طرح سے نل کے پانی کے کنکشن کروڑوں گھروں تک پہنچے ہیں، یہ عوامی امنگوں اور شراکت کی ایک بہترین مثال ہے۔
انہوں نے اپنے ٹویٹ کے ساتھ جے جے ایم کی پیشرفت کی تفصیلات بھی شیئر کیں۔ جے جے ایم کو وزارت جل شکتی کے تحت نافذ کیا جا رہا ہے۔
واضح رہے کہ وزیر اعظم نے 15 اگست-2019 کو جے جے ایم کا اعلان کیا تھا۔ اس کا مقصد 2024 تک ہر دیہی گھر اور سرکاری اداروں کو نل کا پانی فراہم کرنا ہے۔ اس کے اعلان کے بعد سے، چھ کروڑ سے زیادہ گھروں کو نل کے پانی کے کنکشن فراہم کیے گئے ہیں اور اس کے ساتھ ملک میں نل کے پانی کی سپلائی 3.23 کروڑ سے بڑھ کر 9.40 کروڑ سے زیادہ دیہی گھروں تک پہنچ گئی ہے۔ جے جے ایم کا بجٹ 2022-23 کے لیے بڑھا کر 60000 کروڑ روپے کردیا گیا ہے۔