بی جے پی کو اپنا گھر سنبھالنا چاہیے – گہلوت

جے پور، 10 جون (یو این آئی) راجستھان کے وزیر اعلی اشوک گہلوت نے بھارتیہ جنتا پارٹی (بی جے پی) کو اپنا گھر سنبھالنے کی نصیحت کرتے ہوئے کہا ہے کہ راجیہ سبھا انتخابات میں ہمارے تینوں امیدوار آرام سے جیت رہے ہیں۔

مسٹر گہلوت نے آج راجیہ سبھا کی ووٹنگ کے موقع پر میڈیا سے یہ بات کہی۔ انہوں نے کہا کہ پھر میں کہوں گا کہ ہم تینوں سیٹیں آرام سے جیت رہے ہیں اور بی جے پی کو اپنا گھر سنبھالنا چاہئے کیونکہ وہاں پر بھگدڑ مچی ہوئی ہے۔ انہوں نے جس طرح سے دوسرا امیدوار کھڑا کیا، اس کو ان کی پارٹی کے ایم ایل ایز نے ہی لائک نہیں کیا۔ غیر ضروری ہارس ٹریڈنگ سے دوسرے امیدوار کو جتوانے کا کیا جواز ہے؟
انہوں نے کہا کہ پوری ریاست میں اس پر ردعمل ہے۔ غیر ضروری الیکشن کرادئے، ورنہ چاروں سیٹیں، تین ہماری ایک بی جے پی آرام سے جیت لیتی۔ ایسی حرکت کوئی لائک نہیں کرتا۔ پہلے بھی انہوں نے ایسے ہی کیا تھا، پچھلے الیکشن میں بھی ان لوگوں کو وہاں بھی مات کھانی پڑی، اب کی بار پھر ان لوگوں کو شکست ہو گی۔