اے پی:باراتیوں کو لے جانے والی وین حادثہ کا شکار، بعض افراد زخمی

حیدرآباد، 22/اگست (یواین آئی) باراتیوں کو لے جانے والی گاڑی میں حادثہ کے بعد آگ لگ گئی۔اس حادثہ میں بعض باراتی زخمی ہوگئے۔یہ حادثہ اے پی کے ضلع ایلورو کے گُنڈوگلا علاقہ کی قومی شاہراہ پر کل شب اُس وقت پیش آیا جب باراتیوں کو لے جانی والی طوفان وین کے ڈرائیورنے اس کا توازن کھودیا اور یہ گاڑی ڈیوائیڈر سے ٹکراگئی۔

اس کے ساتھ ہی گاڑی میں آگ لگ گئی جس میں یہ گاڑی جل کرمکمل طورپر خاکستر ہوگئی۔اناورم میں شادی کی تقریب میں شرکت کے بعد ضلع گنٹور واپسی کے دوران یہ حادثہ پیش آیا۔حادثہ کے وقت اس گاڑی میں 12باراتی سوار تھے۔مخالف سمت سے آنے والی بائیک کو حادثہ سے بچانے کے دوران اس کے ڈرائیور نے توازن کھودیا اور یہ گاڑی ڈیوائیڈر سے ٹکرانے کے بعد شعلہ پوش ہوگئی۔اس حادثہ میں بعض باراتی زخمی ہوگئے جن کو علاج کے لئے سرکاری اسپتال منتقل کردیاگیا۔