بے روزگار شرابی نے وزیراعظم کو دی جان سے مارنے کی دھمکی، گرفتار

نئی دہلی، 26 مئی (ہ س)۔ ایک شخص جو گزشتہ چھ سالوں سے بے روزگار تھا، نے کل دیر رات وزیر اعظم نریندر مودی کو جان سے مارنے کی دھمکی دی۔ کیس کی اطلاع ملتے ہی پولیس نے ملزم کی کال ٹریس کرکے اسے گرفتار کرلیا۔ ملزم کی شناخت کرول باغ کے رہنے والے ہیمنت (48) کے طور پر کی گئی ہے۔

تفتیش کے دوران پولیس کو معلوم ہوا کہ ملزم باقاعدگی سے شراب پیتا ہے اور ایسی حرکتیں کرتا رہتا ہے۔نئی دہلی ضلع کے ایک سینئر پولیس افسر نے جمعہ کو بتایا کہ پولیس کنٹرول روم کو جمعرات کی رات ایک کال موصول ہوئی جس میں نوجوان نے بتایا کہ وہ وزیر اعظم نریندر مودی کو قتل کر دے گا۔

پولیس کی ٹیم کال موصول ہوتے ہی متحرک ہوگئی۔ نوجوان کی آواز اور گفتگو کے لہجے سے پولیس کو اندیشہ تھا کہ یہ حرکت کسی شرابی کی ہے۔ پولیس ٹیم نے موبائل سرویلانس کی بنیاد پر ملزم نوجوان کی لوکیشن ٹریس کر کے اسے قرول باغ کے علاقے سے گرفتار کر لیا۔ پوچھ گچھ کے دوران ملزم ہیمنت نے اعتراف کیا کہ اس نے یہ حرکت شراب کے نشے میں کی تھی۔

نشے میں دھت ہو کر نوجوان نے اس پر معافی مانگ لی۔ پولیس نے ملزم کے خلاف مقدمہ درج کر کے اسے گرفتار کر لیا ہے۔ پولیس اس کے موبائل نمبر کی کال ڈیٹیل چیک کر رہی ہے اور یہ بھی جانچ کر رہی ہے کہ آیا اس معاملے میں کوئی سازش تو نہیں ہے۔