اگر دہلی کو محفوظ نہیں بنا سکتے تو لیفٹننٹ گورنر کو استعفیٰ دے دینا چاہئے : کیجریوال

نئی دہلی،: دہلی کے وزیر اعلی اروند کیجریوال نے لیفٹیننٹ گورنر ونے کمار سکسینہ کو نشانہ بناتے ہوئے کہا کہ اگر وہ یہاں کے باشندوں کو تحفظ فراہم نہیں کر سکتے تو انہیں اپنے عہدے سے استعفیٰ دے دینا چاہئے ۔

مسٹر کیجریوال نے یہاں پرگتی میدان سرنگ میں چلتی کار سے لوٹ مار کی سی سی ٹی وی فوٹیج جاری کرتے ہوئے کہا، “لیفٹیننٹ گورنر کو استعفیٰ دے دینا چاہئے ۔ کسی ایسے شخص کو ایل جی بنائیں جو دہلی کے لوگوں کو تحفظ فراہم کر سکے ۔ اگر مرکزی حکومت دہلی کو محفوظ نہیں بنا سکتی تو یہ ذمہ داری ہمارے حوالے کر دیں۔ ہم آپ کو دکھادیں گے کہ کس طرح ایک شہر کو اس کے شہریوں کے لیے محفوظ و مامون بنایا جائے ۔”

#WATCH | Delivery agent and associate robbed at gunpoint in Delhi's Pragati Maidan tunnel. CM #Kejriwal calls for LG's resignation.

Click on the 🔗 to know more: https://t.co/xI4U2atFw5#DelhiPolice #DelhiCrime #ABPLive pic.twitter.com/J9340r02aO

— ABP LIVE (@abplive) June 26, 2023

انہوں نے حال ہی میں لیفٹیننٹ گورنر کو خط لکھا تھا جس میں دار الحکومت میں جرائم پیشہ افراد کی وارداتوں میں غیر معمولی اضافہ پر شدید تشویش کا اظہار کیا تھا۔ انہوں نے کہا تھا کہ دہلی میں پہلی بار اتنے بڑے پیمانے پر جرائم میں اضافہ ہوا ہے ۔ بڑھتی ہوئی مجرمانہ وارداتوں کی وجہ سے دہلی کے لوگوں میں خوف و ہراس کا ماحول ہے اور ہر شخص خود کو غیر محفوظ محسوس کر رہا ہے ۔ چیف منسٹر نے لیفٹیننٹ گورنر کو لکھے گئے اپنے خط میں دہلی میں امن و امان کی صورتحال کو بہتر بنانے کے لئے فوری اور موثر اقدامات پر زور دیا ہے ۔
واضح رہے کہ پرگتی میدان سرنگ کے اندر بدمعاشوں نے ہفتہ کے روز ایک کار میں سوار تاجر سے پستول دکھا کر دو لاکھ روپے والا بیگ لوٹ لیا تھا۔ اب اس واقعے کی سی سی ٹی وی فوٹیج منظر عام پر آگئی ہے جس میں موٹر سائیکل سوار جرائم پیشہ گروہ ڈکیتی کی واردات کرتے نظر آرہے ہیں۔