شیعہ علما نےاپنے فرقہ کی 20فیصد حصہ داری کا مطالبہ کیا

برائے اشاعت
آج 15 جولائی 2023شیعہ علما ٔکی عظیم الشان کانفرنس امامیہ ہال نئی دہلی میں منعقد ہوئی۔ جس میں ملک کے مختلف صوبوں سے آئے علما ٔنے شرکت فرمائی ۔
شیعہ علما ٔ کے اجلاس کا آغاز تلاوت کلام پاک سے ہوا اوراجلاس کے مندرجہ ذیل ایجنڈےپر گفتگو ہوئی

۔
۱اتحاد بین العلما ٔ والمومنین کو مضبوط کیا جانا وقت کی اہم ضرور ت ہے ۔ ۲محراب و منبر کو ذاتی اختلافات سے الگ رکھ کر صرف تعلیم اہلبیتؑ و فضائل و مصائب آل محمدؑبیان ہونا چاہیے ۔۳اگر کوئی شیعہ عقائد تشیع کو مسخ کرتا ہے یعنی اخباری وملنگی تو اس کی اصلاح ہونی چاہئے نہ منبر سے کوسا جائے ۔۴یونیفارم سول کو ڈ (یو۔سی۔سی)ہماری شریعت میں مداخلت ہے ۔۵۔ شیعہ فرقہ کو آبادی کے تناسب سے ہر اقلیتی ادارے میں سیٹیں ملنا چاہیے ۔
شیعہ علما ٔ کے اجلاس میں موجود تمام علما ٔحضرات نے متفقہ طور پر کہاکہ اتحاد بین العلما ٔ والمومنین کو مضبوط کیا جانا چاہیے کیونکہ ہم لوگ چودہ معصومینؑ کے ماننے والے ہیں جنہوں نے ہم کو دوسروں سے متحد ہونے کی تلقین کی ہے لہذا ہم خود منتشر رہیں یہ تعلیم آل محمدؑ نہیں ہے ۔ اس کے علا وہ منبر اور محراب کو جوافراد ذاتی اختلافات کے لیے استعمال کرتے ہیں ان کی مذمت ہوناچاہیے کیونکہ یہ وہ جگہیں ہیں جہاں سے امر بالمعروف و نہی عن المنکر کے پیغام کو عام کرنا ضروری ہے اور وہ افراد جو شیعہ ہوتے ہوئے عقائد تشیع سے بھٹک گئے ہیں ان کو منبر سے برا بھلا کہنے کے بجائے گفتگو کرکے ان کی اصلاح کرنی چاہیے ۔

شیعہ علما ٔ کانفرنس میں 5قرار داد منظور ہوئی ،منظور شدہ مطالبات کو حکومت ہند و صوبوں کی حکومتوں کےسامنے رکھا گیا ۔
1-اجلاس میں موجود تمام علما ٔنے اس بات پر اتفاق کیا کہ شیعہ قوم کے اندر آپسی اتحاد کو مضبوط کیا جائے اور ملک کی سالمیت اور امن و امان کو قائم رکھتے ہوئے تمام مذاہب کے درمیان اتحاد اور بھائی چارہ بڑھایا جائے ۔ اس کے علا وہ ہر وہ تنظیم ،گروہ یاافرادجوطاغوتی طاقتوں کے اشارے پر ملک کے سماجی تانا بانا کو منتشر کرنے پر آما دہ ہیں اورملک کے امن کو خطرہ پہنچانے کی کو شش کررہے ہیں اس کی مذمت کرنا لازمی قراد دیں۔یہ اجلاس حکومت ہندسے مطالبہ کرتا ہے کہ ایسی فلمیں یاوہ نصاب جوکسی بھی مذہب کے جذبات کو ٹھیس پہنچائے ان کے اوپر پا بندی عائد ہوناچاہئے۔

2-شیعہ علما ٔکااجلاس یونیفارم سول کوڈ کے موضوع پر مسلم پر سنل لابورڈ کے مو قف کی حمایت کرتے ہوئے حکومت ہند سے اپیل کر تا ہے کہ ملک میں مختلف مذاہب کے لوگ رہتے ہیں اور ہر ایک اپنی عقیدت کے اعتبار سے ملک کے آئین کے تحت زندگی بسر کر رہا ہے کیونکہ ہمارے ملک کے آئین نے ہر ہندوستانی کو اس بات کا حق دیا ہے کہ وہ اپنے مذہب کے اعتبار سے زندگی بسر کرے ۔ لہذا یونیفارم سول کوڈ غیر ضروری ہے جیسا کہ شری منی گردوارا پر بندھک کمیٹی و حکومت ناگالینڈو حکومت میزورم نے بھی یونیفارم سول کو ڈ کو لاگو نہ کیے جانے کا مطالبہ کیا ہے ۔

3-شیعہ علما ٔ کا اجلاس مر کزی حکومت اور صوبائی حکومتوں سے اس بات کی مانگ کر تا ہے کہ ملک میں اور ریاستوں میں جو اقلیتی ادارے ہیں اس میں شیعہ فرقہ کے لوگوں کو 20فیصد حصہ داری دی جائے ۔
4-شیعہ علما ٔ کا اجلاس حکومت ہندسے مانگ کر تا ہے کہ کشمیر سے کنیا کماری تک تمام ریاستوں میں مختلف مذاہب کے اشخاص کو گورنر کے منصب پر فائز کیا گیا ہے اور شیعہ قوم کو ہمیشہ نظر انداز کیا گیا ۔ ہم مانگ کرتے ہیں کہ ایک ہماری قوم کے شخص کو گورنر بنایا جائے اور مر کزی وزارت میں بھی شیعہ قوم کی نمائندگی کو یقینی بنایا جائے ۔ اسی کے ساتھ صوبائی حکومتوں سے بھی یہ اجلاس ما نگ کر تا ہے کہ ہر صوبہ کی حکومت اپنی کابینہ میںشیعہ قوم کی نمائندگی کو یقینی بنائے ۔

5-مسلم فرقہ میں عید الفطر اور عید قربان جو کہ محترم عیدیں ہیں لیکن عید غدیر جو اسلامی نکتہ نظر سے سب سے بڑی عید ہے اس دن حضرت محمد مصطفیٰﷺنے حج سے واپسی پر خم کے میدان میں حضرت علیؑکو مسلمانوں کا خلیفہ بنانے کا اعلان کیا اور اسی دن دین اسلام مکمل ہوا تھا ۔

حضرت علیؑتمام مسلمانوں کے خلیفہ ہیں اس کے علا وہ دنیا کی ہر قوم حضرت علیؑسے عقیدت رکھتے ہوئے ان کی حیات پر آج بھی ریسرچ کر رہی ہے ۔لہذا مرکزی حکومت سے ما نگ کرتے ہیں کہ مسلمانوںکی عقیدت کا خیال کرتے ہوئے 18؍ذی الحجہ عید غدیر کے دن تعطیل عام کی جائے ۔
نظامت کے فرائض عباس رضا نیرؔ نے انجام دیئے ۔ اس کے علا وہ اجلاس میں ہندوستان سے آئے سیکٹروں علما ٔ نے شرکت کی کشمیر و کر گل سے تشریف لائے حجۃ الاسلام مولانا شیخ خلیلی ، حجۃ الاسلام مولانا شیخ بہشتی ،کرناٹک سے حجۃ الاسلام مولانا سید محمدابراہیم ،بہار سے حجۃ الاسلام مولانا امانت حسین ، جھارکھنڈسے حجۃ الاسلام مولانا تہذیب الحسن ، پوروانچل اتر پر دیش سے حجۃ الاسلام مولانا ابن حسن املوی ، مہا راشٹریہ سے خطیب اہلبیتؑ مولانا ظہیر عباس ، راجستھان سے حجۃ الاسلام مولانا علی حیدر ، مولانا کاظم علی ،اترا کھنڈ سے مولانا غلام علی، حجۃ الاسلام مولانا اشتیاق حسین سیتاپور ، مولانا غضنفر عباس دہلی ، مولانا جو ہر عباس مدھیہ پر دیش ، دہلی سے مولانا امام حیدر زیدی ، مولانا محمد معصوم ، مولانا زماں با قری ، مولانا سید افضال نقوی میرٹھ ، مولانا سید اظہر کاظمی ، مولانا باقر کاظمی ، مولانا رضی حیدرمنگلوری ، مولانا فصیح حیدر مظفر نگر ، مولانا نسیم الحسن سطان پور ، مولانا نسیم الحسن اعظم گڑھ ، مولانا جرار حسین املوی ، مولانا محمد رضا ایلیا مبارکپور، مولانا اعجاز حسین ، مولانا ڈاکٹر سلمان ، مولانا وزیر حسن زینبی ، مولانا قمر الحسن ، مولانا سہیل عبا س، مولانا شبیہ الحسن ، مولانا کاظم واحدی ، مولانا نفیس اختر ، مولانا مرزا واحد حسین ، مولانا مظہر غازی ، مولانا محمد افضل عباس ، مولانا صفی اصغر ، ومولانا رضی حیدر ، مولانا شرر نقوی وغیرہ