مظفر پور میں پراپرٹی ڈیلر سمیت تین لوگوں کا قتل

مظفر پور، 22 جولائی۔ بہار کے مظفر پور میں ایک پراپرٹی ڈیلر اور اس کے دو باڈی گارڈ کو گولی مار کر ہلاک کر دیا گیا۔ اس فائرنگ میں پراپرٹی ڈیلر آشوتوش شاہی کی موقع پر ہی موت ہو گئی، جب کہ انہیں بچانے کے لیے آئے ان کے تین محافظوں کو بھی گولیاں لگیں۔ ان میں سے دو کی اسپتال میں علاج کے دوران موت ہوگئی۔ یہ معاملہ مظفر پور ضلع کے ٹاون تھانہ علاقے سے متعلق ہے۔ بتایا جا رہا ہے کہ موٹر سائیکل سوار بدمعاشوں نے واردات کو اس وقت انجام دیا جب پراپرٹی ڈیلر آشوتوش شاہی ایک وکیل کے گھر پہنچے تھے۔

اس کے کچھ ہی دیر بعد دو بائک پر سوار چار بدمعاش ایڈوکیٹ کے گھر میں داخل ہوئے اور اندھا دھند فائرنگ شروع کر دی۔ اس واقعے میں مجموعی طور پر پانچ افراد کو گولیاں لگیں۔ جن میں سے پراپرٹی ڈیلر آشوتوش شاہی اور دو گارڈ کی موت ہو گئی ہے۔مقامی رہائشی نے بتایا کہ گولی چلانے والے چار لوگ تھے، جو دو بائک پر آئے تھے۔

گولی آشوتوش شاہی اور ان کے باڈی گارڈ کو بھی لگی۔ فائرنگ کے اس واقعے کے بعد علاقے میں کہرام مچ گیا۔ موقع پر لوگوں کی بڑی بھیڑ جمع ہوگئی۔ اس وقت پورا علاقہ پولیس چھاونی میں تبدیل ہوچکا ہے اور پولیس ٹیم تفتیش میں مصروف ہے۔